Veliaj kërkon pjesëmarrje në asamblenë e PS nga burgu

Kryetari i burgosur i Bashkisë së Tiranës ka kërkuar zyrtarisht që të marrë pjesë fizikisht ose nëpërmjet videokonferencës në mbledhjen e asamblesë së Partisë Socialiste, e cila është parashikuar të mbahet këtë të shtunë. Letra zyrtare i është drejtuar sekretarit të përgjithshëm të partisë, Blendi Klosi, si dhe Prokurorisë së Posaçme.

Për të mbështetur kërkesën e tij, ai ka përmendur funksionet që mban brenda strukturave politike dhe institucionale. «Unë jam anëtar i Asamblesë Kombëtare, i Kryesisë së Partisë Socialiste, drejtues politik i qarkut Tiranë, kryetar i Partisë Socialiste Tiranë, si dhe kryetar i zgjedhur i Bashkisë Tiranë», ka shkruar ai, duke shtuar se pjesëmarrja e tij lidhet drejtpërdrejt me të drejtat që i burojnë nga anëtarësia dhe funksionet në organet drejtuese.