Rama: Shqipëria drejt BE-së, por varet nga vetë Europa

Kryeministri Edi Rama mori pjesë në Forumin e Paqes në Paris, ku u ndal te zhvillimi ekonomik i vendit, procesi i anëtarësimit në Bashkimin Europian, si dhe te situata në Ballkanin Perëndimor bashkë me tensionet mes Kosovës dhe Serbisë. Gjatë këtij bashkëbisedimi, ai u shpreh se nuk mund të japë premtime për një proces që nuk varet ekskluzivisht nga Shqipëria.

«E dini shumë më mirë se nuk premtoj dot asgjë për Europën. Unë kurrë nuk premtoj dot për gjëra që s’varen prej meje», u shpreh Rama, duke shtuar se bazuar në progresraport, Komisioni Europian ka përcaktuar vitin 2027 për punën me Traktatin e Anëtarësimit, ndërsa negociatat mund të mbyllen në fund të vitit të ardhshëm nëse gjithçka shkon mirë.

Kryeministri theksoi gjithashtu se sfida më e madhe e unionit mbetet përballja me sfidat e veta dhe me ndikimin e medias sociale. «Shpresoj që si fillim BE t’ ia dalë më sukses të shpëtojë prej vetvetes, çdo gjë tjetër do jetë në rregull për ne», u shpreh ai, duke paralajmëruar se politika evropiane rrezikon të humbasë qendrën nëse nuk përballet me këto dukuri.