Vdes 52-vjeçari i plagosur me armë zjarri në Lipjan
Fatmir Olluri ndërroi jetë në QKUK pasi nuk u mbijetoi plagëve në kokë; trupi i tij është dërguar në obduksion.
LIPJAN — Ka ndërruar jetë në Qendrën Klinike Universitare të Kosovës (QKUK) Fatmir Olluri, 52-vjeçari nga Dobraja e Madhe e Lipjanit, i cili kishte pësuar plagë të rënda në kokë nga arma e zjarrit. Olluri nuk ka arritur t'u mbijetojë lëndimeve dhe ka vdekur mbrëmjen e 5 gushtit në Intensiven Qendrore.
Viktima fillimisht ishte dërguar nga familjarët në Emergjencën e Lipjanit pasi ishte gjetur i plagosur. Për shkak të gjendjes së rëndë shëndetësore, ai u transferua për trajtim të mëtutjeshëm në QKUK. Në vendin e ngjarjes kanë dalë njësitë policore, ndërsa arma që dyshohet se u përdor është sekuestruar.
Rasti fillimisht ishte iniciuar nga Prokurorja kujdestare për Krime të Rënda si vetëvrasje në tentativë. Pas vdekjes së Ollurit, trupi i pajetë është dërguar në Institutin e Mjekësisë Ligjore për obduksion, ndërsa rasti tashmë po hetohet nga Prokuroria e Shtetit si hetim mbi vdekjen.
Burim: Sinjali
— Redaksia ZHURMA