UBT hap edicionin e 15-të të Konferencës Ndërkombëtare Shkencore

UBT ka hapur zyrtarisht edicionin e 15-të të Konferencës Ndërkombëtare Shkencore në Parkun Shkencor, Inovativ dhe Teknologjik të UBT-së, ku po marrin pjesë mbi 1,000 studiues, shkencëtarë, profesionistë dhe ekspertë nga më shumë se 30 shtete të botës. Ngjarja akademike ka për qëllim edicionin e sivjetshëm edhe shënimin e 25-vjetorit të themelimit të këtij institucioni.

Aktiviteti organizohet si një platformë ndërdisiplinore për të nxitur kërkimin shkencor, shkëmbimin e njohurive si dhe bashkëpunimin ndërkombëtar. Gjatë rrugëtimit të tij çerek-shekullor, institucioni është shndërruar në një ekosistem akademik e shkencor që sot numëron rreth 300 laboratorë, 150 fusha studimi, më shumë se 500 partneritete ndërkombëtare si dhe mbi 400 anëtarë stafi me kohë të plotë që zotërojnë tituj doktorature.

Gjatë hapjes së punimeve, presidenti dhe rektori i UBT-së, Prof. Dr. Edmond Hajrizi, vuri në dukje se sfidat kryesore si ndryshimet klimatike, inteligjenca artificiale apo kujdesi shëndetësor kërkojnë bashkëpunim ndërmjet disiplinave të ndryshme. Ai sqaroi se synimi i kësaj platforme është ngritja e cilësisë shkencore, bashkëautorësia ndërkombëtare dhe zgjidhja e problemeve me ndikim shoqëror. Rektori Hajrizi po ashtu veçoi se mjetet e inteligjencës artificiale duhet të mbështesin dhe jo të zëvendësojnë gjykimin shkencor.

Programi i konferencës zhvillohet përmes dhjetëra seancave paralele që mbulojnë një sërë fushash. Punimet përfshijnë mjekësinë, infermierinë, farmacinë, stomatologjinë dhe mjekësinë sportive. Po ashtu, seancat mbulojnë teknologjinë dhe inxhinierinë me fokus në shkencat kompjuterike, inteligjencën artificiale, mekatronikën, robotikën dhe sigurinë e informacionit, përveç arkitekturës, artit, dizajnit, ekonomisë, drejtësisë, shkencave politike, medias, psikologjisë, arsimit e mjedisit.

Në kuadër të punimeve po prezantohen edhe struktura e platforma të posaçme inovative. Vëmendje e veçantë i është kushtuar platformës UBT Smart City, e cila shërben si laborator për testimin e teknologjive të reja. Njëkohësisht po paraqitet zhvillimi i Qendrave të Ekspertizës dhe Instituteve të specializuara, ku përfshihen AI Business Hub dhe Instituti i Mjekësisë Sportive.