Trump: SHBA-së nuk i nevojitet marrëveshje me Iranin

Presidenti amerikan, Donald Trump, deklaroi se Shteteve të Bashkuara nuk u nevojitet një marrëveshje me Iranin, duke pretenduar se Uashingtoni ka tashmë ndikim të konsiderueshëm dhe kontroll mbi Teheranin. «Nuk kemi nevojë për një marrëveshje me Iranin. Ato ditë kanë kaluar prej kohësh. Ne i kemi paratë e tyre, qindra miliarda dollarë, dhe e kemi nën kontroll Ngushticën e tyre!», shkroi ai në platformën Truth Social, duke iu referuar Ngushticës së Hormuzit, e cila pëubret si korridor jetik për transportin global të energjisë.

Këto deklarata shtuan shqetësimet në tregje se përfundimi i konfliktit nuk është në horizont, duke sjellë rritje të çmimeve të naftës. Nafta Brent u shtrenjtua me 1.6%, duke arritur në 94.25 dollarë për fuçi, sipas revistës Monitor. Krahas kësaj, gazeta Wall Street Journal raportoi se zëvendëspresidenti JD Vance po shqyrton një takim të drejtpërdrejtë me sekretarin e Këshillit të Lartë të Sigurisë Kombëtare të Iranit, Mohsen Rezaei, si pjesë e përpjekjeve për të rifilluar bisedimet.

Në të njëjtin reagim, Trump bëri të ditur se i ka kërkuar zëvendëspresidentit Vance që ta përqendrojë vëmendjen te korrupsioni dhe krimi në shtetet e qytetet e drejtuara nga demokratët, duke veçuar Minesotën, Kaliforninë dhe Illinoisin. «Buxheti ynë mund të balancohet shpejt nëse korrigjohen këto aktivitete kriminale në shkallë të gjerë», shkroi presidenti amerikan.