Trump kërkon nga Netanyahu zbatimin e planit për Gazën

Presidenti amerikan Donald Trump i ka kërkuar kryeministrit izraelit Benjamin Netanyahu që të avancojë me zbatimin e planit amerikan të paqes për Gazën, pas përfundimit të zgjedhjeve në Izrael. Kërkesa u bë gjatë një bisede telefonike mes dy liderëve, ku sipas mediave izraelite dhe dy burimeve amerikane u diskutua për procesin dhe luftën me Iranin.

Zbatimi i planit të Trump kishte mbetur i ngrirë gjatë fushatës zgjedhore në Izrael. Zyrtarët kishin paralajmëruar se qeveria e Netanyahut mund të ballafaqohej me reagime të forta politike nëse lejonte rindërtimin e Gazës para çarmatimit të plotë të Hamasit. Sidoqoftë, presidenti amerikan kërkon përparim konkret në planin e tij prej 20 pikash, i cili parashikon çarmatimin e Hamasit dhe kalimin e administrimit të Gazës te një qeveri teknokratike palestineze.

Sipas një zyrtari të lartë amerikan që foli për televizionin izraelit Channel 12, rindërtimi i Gazës do të kushtëzohet nga përparimi drejt çarmatimit të Hamasit. Uashingtoni kërkon bashkëpunimin e plotë të Izraelit në këtë proces, megjithëse nuk u specifikua shkalla e saktë e çarmatimit para nisjes së rindërtimit. Një burim i njohur me diskutimet bëri të ditur se administrata Trump, Bordi i Paqes dhe Izraeli bien dakord se plani me 20 pika është rruga më e mirë përpara.

Ndërkohë, sipas raportimeve të Channel 12, shefi i Shtabit të Përgjithshëm të ushtrisë izraelite, Eyal Zamir, thirri një mbledhje urgjente për shkak të situatës humanitare në Rripin e Gazës, ku mbi 70 mijë tenda janë përmbytur nga moti i rëndë dhe kanë prekur dhjetëra mijëra palestinezë të zhvendosur. Zyrtarë të sigurisë thanë se ushtria druhet se Hamasi mund ta shfrytëzojë krizën për të kërkuar rindërtim para çarmatimit. Për këtë arsye, Zamir kërkoi përgjigje përmes diplomacisë publike dhe vijimin e hyrjes së ndihmave humanitare.