Projekti i buxhetit parashikon rritje ekonomike dhe të ardhura më të larta

Prodhimi kombëtar i Shqipërisë pritet të kalojë për herë të parë vlerën e 30 miliardë eurove në vitin 2027, duke shënuar një rritje prej 1.5 miliardë eurosh krahasuar me vitin aktual 2026 që mbyllet me rreth 29 miliardë euro. Sipas relacionit të projektbuxhetit, në periudhën afatmesme 2027-2029 rritja mesatare parashikohet të jetë rreth 4.0% në vit, ndërsa për vitin 2027 ekonomia pritet të rritet me 3.9%, e mbështetur nga kërkesa e brendshme dhe sektori i shërbimeve.

Sektori i shërbimeve, i nxitur nga turizmi dhe teknologjia e informacionit, do të japë kontributin kryesor me 2.8% në rritjen e përgjithshme, i ndjekur nga ndërtimi me 0.4% dhe industria me 0.2%, ndërsa bujqësia parashikohet të rritet me vetëm 0.2% pa dhënë ndikim thelbësor. Ministria e Financave njofton se të ardhurat për frymë gjatë vitit 2027 do të arrijnë në 12,889 euro nga 12,199 euro këtë vit, duke u përkthyer në rreth 1,073 euro në muaj ose 35 euro në ditë.

Në të njëjtën kohë, borxhi publik llogaritet të ulet në 52.4% të PBB-së në vitin 2027, nga 52.5% që pritet përgjatë këtij viti, ndërsa në vlerë do të arrijë në 16.9 miliardë euro. Rritja e pagave në kushtet e një inflacioni të stabilizuar pritet të stimulojë të ardhurat reale të individëve.