Tragjedia në Demiraj, dyshime për mjet shpërthyes pas vdekjes së dyfishtë

Një ngjarje e rëndë ka ndodhur në fshatin Demiraj të komunës së Gjilanit, ku janë gjetur pa shenja jete një person i gjinisë mashkullore i vitit të lindjes 1999 dhe një foshnjë tre muajshe. Zëdhënësi i Policisë për Rajonin e Gjilanit, Ismet Hashani, ka bërë të ditur se informacioni është pranuar më 1 nëntor, rreth orës 08:47, për dy trupa të pajetë në një shtëpi. Në vendin e ngjarjes kanë dalë njësitet policore, Prokurori i Shtetit dhe ekipi emergjent mjekësor, i cili ka konstatuar vdekjen e tyre.

Sipas autoriteteve, me vendim të Prokurorit të Shtetit, trupat e pajetë janë dërguar në Institutin e Mjekësisë Ligjore në Prishtinë për obduksion. Policia e ka cilësuar rastin si vdekje e dyshimtë dhe po ndërmerr veprime hetimore për ndriçimin e rrethanave, ndërsa institucionet ende nuk kanë dhënë një version zyrtar për shkakun e ngjarjes.