Torres: Policia në Shqipëri duhet t'i japë fund dhunës ndaj protestuesve

Kongresmeni amerikan Ritchie Torres ka kërkuar që Policia e Shtetit në Shqipëri t'i japë fund dhunës ndaj protestuesve, duke cilësuar të papranueshme veprimet e ndërmarra gjatë tubimeve. Zyrtari nga Shtetet e Bashkuara të Amerikës kërkoi shtensionimin e menjëhershëm të situatës dhe respektimin e të drejtës së qytetarëve shqiptarë për të protestuar në mënyrë paqësore.

Reagimi i zyrtarit amerikan vjen pas shpërthimit të tensioneve dhe përshkallëzimit të dhunës së raportuar gjatë protestave të zhvilluara në Shqipëri. Ndërhyrja e forcave të rendit ndaj pjesëmarrësve në tubime nxiti reagime rreth respektimit të standardeve demokratike dhe të drejtave të njeriut gjatë përplasjeve në rrugë.

Përmes një postimi në rrjetin social X, kongresmeni Ritchie Torres, i cili përfaqëson distriktin e 15-të të New Yorkut në Dhomën e Përfaqësuesve të Shteteve të Bashkuara — zonë që përfshin një pjesë të Bronxit — u shpreh thellësisht i shqetësuar nga dhuna e ushtruar. Sipas kongresmenit amerikan, policia ka detyrimin të garantojë zbatimin e shtetit të së drejtës dhe të ruajë sundimin e ligjit, ndërsa bëri thirrje për ndalimin e menjëhershëm të veprimeve policore për të parandaluar përshkallëzimin e mëtejshëm të situatës alarmante.

Ndërkohë që situata mbetet e tensionuar, kërkohet ulja e tensioneve dhe ndalimi i përplasjeve për të garantuar mbarëvajtjen paqësore të tubimeve në vend.

Në reagimin e tij publik, Torres deklaroi: «Jam thellësisht i shqetësuar nga shpërthimi i dhunës ndaj protestuesve në Shqipëri. Veprimet e ndërmarra nga Policia e Shqipërisë janë të papranueshme dhe duhet të marrin fund. Shqiptarët kanë të drejtë të protestojnë në mënyrë paqësore, policia duhet të respektojë të drejtën e protestuesve për të protestuar dhe duhet të garantojë zbatimin e shtetit të së drejtës. Situata duhet të shtensionohet për t’i dhënë fund dhunës alarmante.»