Torino: Arrestohen tre shqiptarë me kokainë e armë të vjedhur
Policia italiane në Torino arrestoi tre shtetas shqiptarë pasi zbuloi mbi 2.9 kilogramë kokainë, një armë zjarri dhe para në banesën e tyre.
Redaksia ZHURMA · · 1 min lexim
Tre shtetas shqiptarë të moshave 25, 29 dhe 31 vjeç janë vënë në pranga në Torino të Italisë, pasi dyshohen për posedim dhe shpërndarje të lëndëve narkotike. Gjatë kontrollit në apartamentin e tyre në lagjen Nizza-Millefonti, ku jetonin ilegalisht, autoritetet gjetën 2.8 kilogramë kokainë të fshehur në një çantë shpine brenda dollapit, si dhe 105 gramë të tjerë të së njëjtës substancë. Operacioni u zhvillua pas hetimeve të oficerëve të stacionit policor Barriera Milano, të cilët kishin vëzhguar lëvizjet e njërit prej të dyshuarve që kryente dërgesa të dyshimta me një veturë me qira, pasi ishte larguar nga një klub nate.
Sipas agjencisë italiane të lajmeve Ansa, në banesë u sekuestrua gjithashtu një pistoletë e raportuar si e vjedhur, e pajisur me karikator dhe pesë fishekë. Policia konfiskoi edhe një kallëp të punuar në shtëpi që dyshohet se shërbente për ngjeshjen e drogës, një peshore precize, materiale paketimi, një thikë kuzhine dhe afër 3 mijë euro para të gatshme, të cilat dyshohet se burojnë nga aktiviteti i paligjshëm.