Tiranë: Molotovë e gurë në protestën e 19-të; tre të arrestuar

TIRANË — Protesta e 19-të në Tiranë nisi e ndarë në dy fronte, ku studentët u mblodhën para Ministrisë së Arsimit, ndërsa protestuesit e opozitës marshuan drejt Kryeministrisë me në krye deputetët Flamur Noka, Agron Gjekmarkaj, Gazment Bardhi dhe Bledion Nallbati. Kryetari i Partisë Demokratike, Sali Berisha, nuk mori pjesë në këtë marshim, ndonëse kishte ftuar më parë qytetarët që t'i bashkoheshin tubimit në mbështetje të studentëve. Pasi qëndruan rreth 30 minuta para Kryeministrisë, protestuesit e opozitës u drejtuan për te Ministria e Arsimit, ku pati një përplasje verbale me një protestues që u kërkoi deputetëve të largoheshin.

Situata u përshkallëzua më tej kur një pjesë e protestuesve nisën të heqin pllaka guri nga trotuaret dhe t'i hedhin drejt forcave të rendit. Policia e Shtetit paralajmëroi se personat e maskuar që hidhnin sende të forta ishin identifikuar dhe u bëri thirrje të tjerëve të distancohen, duke kujtuar edhe aktin normativ të qeverisë që ndalon maskat dhe dhunën ndaj efektivëve. Gjatë orëve të pasdites, protestuesit hodhën breshëri molotovësh drejt forcave të policisë, të cilat u përgjigjën duke përdorur autobotët me ujë. Pas incidenteve të regjistruara gjatë zhvillimeve para Kryeministrisë, policia nisi shoqërimin dhe arrestimin e disa prej protestuesve.