Tirana mposht Vorën

TIRANË — Tirana ka arritur një fitore bindëse kundër Vorës në stadiumin “Selman Stërmasi” me rezultat 4-0, duke siguruar tri pikët e para në kampionatin “Abissnet Superiore”.

Fillimi i sezonit ishte i vështirë për Tiranën, me dy humbje radhazi ndaj Egnatias dhe Teutës. Megjithatë, në ndeshjen e parë të luajtur në shtëpi, skuadra më e titulluar në vend tregoi një paraqitje fantastike.

Golat e Tiranës erdhën nga Tomislav Kiš, Redon Xhixha dhe Drilon Hazrollaj, i cili shënoi dy herë. Kjo fitore e vendos Tiranën në vendin e gjashtë të renditjes, me të njëjtat pikë si Vora.

Kampionati aktualisht kryesohet nga Egnatia, me tre fitore në tre ndeshje, ndërsa Teuta ndjek me 7 pikë.