Sa fëmijë presin një vend në çerdhet dhe kopshtet e Tiranës?

TIRANË — Mbi 4,300 fëmijë rezultojnë të regjistruar në listat e pritjes për të siguruar një vend në çerdhet dhe kopshtet publike të kryeqytetit. Sipas Raportit Kombëtar i Performancës së Bashkive, kjo shifër përfshin rreth 1,950 fëmijë në pritje për çerdhe dhe rreth 2,400 të tjerë për kopshte, duke treguar se kapacitetet e reja absorbohen menjëherë pas hapjes.

Sistemi publik i arsimit parashkollor ka përtryer një rritje të ndjeshme, ku numri i fëmijëve të regjistruar u rrit nga 17,309 në vitin 2019–2020 në 24,650 në vitin 2024–2025. Kjo përfaqëson një shtim prej mbi 7,300 fëmijë, ose rreth 42% më shumë brenda pesë viteve, gjë që reflekton mbështetjen në rritje të familjeve tek shërbimet publike.

Bashkia e Tiranës ka zgjeruar infrastrukturën duke rritur kapacitetin total nga 19,660 vende në 28,410 vende deri në vitin 2024. Gjatë kësaj periudhe janë ndërtuar 29 çerdhe dhe 27 kopshte të reja, një nga investimet më të mëdha të institucionit në sektorin e edukimit të hershëm për të përballuar presionin demografik.

Paradoksi i kryeqytetit qëndron në faktin se ndërkohë që Shqipëria përballet me rënie të lindjeve dhe plakje të popullsisë, Tirana vijon të rritet. Kjo ndodh për shkak të migrimit të vazhdueshëm të brendshëm nga qarqet e tjera, duke e bërë kryeqytetin destinacionin kryesor për punësimin dhe shërbimet publike.

Të dhënat e Censusit 2023 konfirmojnë këtë trend, ku popullsia e Bashkisë së Tiranës është rritur nga 418 mijë banorë në vitin 2011 në afro 679 mijë banorë. Kjo rritje prej mbi 62% në një dekadë shpjegon pse kërkesa për shërbimet parashkollore rritet më shpejt se aftësia e institucionit për të ndërtuar hapësira të reja.

Përveç godinave, ka pasur përmirësime edhe në cilësinë e shërbimit përmes shtimit të stafit pedagogjik. Raporti fëmijë-edukatore ka rënë nga 7.6 në 6.1 në çerdhe, ndërsa në kopshte nga 12.1 në 9.8 fëmijë për edukatore, gjë që tregon një përpjekje për të rritur standardet e kujdesit.

Ekspertët vlerësojnë se aksesi në edukimin e hershëm është një faktor kritik që ndikon drejtpërdrejt në punësimin e prindërve dhe produktivitetin e ekonomisë. Për këtë arsye, organizata si UNICEF dhe Banka Botërore e trajtojnë zgjerimin e këtyre shërbimeve jo vetëm si politikë sociale, por si një strategji ekonomike për kapitalin njerëzor.

Burim: Faktoje
— Redaksia ZHURMA