Thaçi: Pres lirimin nga çdo akuzë para aktgjykimit të 16 shtatorit

Ish-presidenti i Kosovës, Hashim Thaçi, ka deklaruar se pret të shpallet i pafajshëm nga të gjitha akuzat në procesin gjyqësor që po zhvillohet ndaj tij në Dhomat e Specializuara të Kosovës në Hagë. “Pres lirimin nga çdo akuzë. Nuk kam çka t’u shtojë argumenteve të ekipeve mbrojtëse, si dhe fjalës sime përfundimtare në sallën e gjyqit”, ka thënë Thaçi.

Aktgjykimi në rastin ndaj Thaçit dhe ish-krerëve të tjerë të UÇK-së, Kadri Veselit, Rexhep Selimit dhe Jakup Krasniqit, pritet të shpallet më 16 shtator.

I pyetur nëse është penduar për iniciativën për themelimin e Dhomave të Specializuara, Thaçi ka thënë se nuk është penduar, por ka kritikuar mënyrën se si, sipas tij, është përdorur vullneti i institucioneve të Kosovës. “Jo. Por nuk do të besoja se vullneti i të zgjedhurve të popullit të Kosovës do të keqpërdorej kaq brutalisht”, ka theksuar ai.

Thaçi ka folur edhe për narrativën e Prokurorisë së Specializuar, duke thënë se ajo fillon nga vitet e tetëdhjeta dhe kulmon me Raportin e Dick Martyt. Ai ka potencuar se procesi do të ketë ndikim në ecurinë e drejtësisë ndërkombëtare.