Çfarë tha Myftiu Tërnava për jostabilitetin politik në Kurban Bajram?
Myftiu i Kosovës në Hytben e Kurban Bajramit thirrje për pastrimin e zemrave nga urrejtja, por edhe për reflektim të klasës politike.
PRISHTINË — Myftiu i Kosovës, Naim Tërnava, mbajti të martën Hytben e Kurban Bajramit në Xhaminë e Madhe të Prishtinës. Para besimtarëve myslimanë, ai bëri thirrje që zemrat e tyre të pastrohen nga "urrejtja, përçarja dhe egoizmi".
Tërnava theksoi se miliona besimtarë janë mbledhur në Mekë, duke përfshirë haxhinjë nga Kosova, për të dëshmuar "unitetin, barazinë edhe devotshmërinë e besimit islam". Ai iu bëri thirrje besimtarëve të forcojnë lidhjet familjare e shoqërore dhe të ndihmojnë nevojtarët.
Në pjesën politike të fjalimit, Tërnava u shpreh se "jostabiliteti politik ka lodhur popullin tonë dhe ka shqetësuar aleatët tanë". Ai kritikoi mbajtjen e zgjedhjeve të njëpasnjëshme, duke thënë se ato po humbin besimin e popullit në politikë, dhe kërkoi nga spektri politik të reflektojë.
Myftiu e lidhi mesazhin me ruajtjen e identitetit kombëtar: "Një komb që harron rrënjët e veta, rrezikon të humb në histori", tha ai, duke e cilësuar ruajtjen e gjuhës shqipe si "shumë të rëndësishme" për popullin shqiptar.
Burim: Zëri
— Redaksia ZHURMA