Tërmeti me magnitudë 5.7 lë dhjetëra të plagosur në Japoninë qendrore

Të paktën 24 persona janë plagosur si pasojë e një tërmeti me magnitudë 5.7 që goditi Japoninë qendrore gjatë natës mes të shtunës dhe të dielës, në orën 01:04 sipas kohës lokale. Agjencia Meteorologjike e Japonisë dhe autoritetet vendore njoftuan se epiqendra e lëkundjes ndodhej në pjesën perëndimore të prefekturës Shizuoka, në një thellësi prej 40 kilometrash dhe rreth 200 kilometra në perëndim të Tokios. Ky tërmet vjen pasi më parë ishte raportuar për një ngjarje tjetër sizmike me magnitudë 4.3 në prefekturën Kumamoto në jugperëndim të vendit.

Tërmeti u ndje në disa rajone të tjera, përfshirë Kioton, Narën, Gifun dhe Yamanashin, ndërsa Kyodo News raportoi se kjo lëkundje sizmike ishte më e rënda që ka goditur prefekturën Aichi në rreth tre dekada. Sipas operatorit Chubu Electric Power Co, nuk janë zbuluar anomali në centralin bërthamor Hamaoka që ndodhet në Shizuoka, si dhe nuk është lëshuar ndonjë paralajmërim për cunami.

Raportimet e mediave lokale, përfshirë gazetën Chunichi Shimbun dhe televizionin Tokai, tregojnë se lëndimet u koncentruan në prefekturat Shizuoka dhe Aichi. Një zyrtar i shërbimeve të emergjencës në Aichi deklaroi se 16 persona pësuan dëmtime të lehta. Ndërkohë, në Shizuoka u raportuan tre të plagosur, mes të cilëve një 90-vjeçare e cila u rrëzua nga shtrati prej lëkundjeve. Ndërtesat dhe dyqanet në qytetet e prekura pësuan thyerje të xhamave.

Lëkundjet shkaktuan vonesa dhe pezullim të shërbimeve të transportit hekurudhor lokal, si dhe anulime në linjën e trenave me shpejtësi të lartë Shinkansen. Autoritetet japoneze kanë paralajmëruar qytetarët për mundësinë e lëkundjeve të tjera sizmike në ditët në vijim, si dhe për rreziqet që vijnë nga rënia e shkëmbinjve dhe rrëshqitjet e dheut.