Taulant Balla nga Golemi: Reforma Territoriale i dha statusin e qytetit

KAVAJË — Drejtuesi politik i Partisë Socialiste për Qarkun Tiranë, Taulant Balla, zhvilloi një takim me qytetarët në Golem, ku vuri në fokus statusin e ri të qytetit, potencialin turistik të zonës dhe nevojën për më shumë investime. Balla u ndal te kundërshtimi i këtij vendimi, duke ironizuar qëndrimin e kryetarit në ikje të Bashkisë Kavajë, Fisnik Qosja, të cilin e quajti më të qesharakun kundër këtij vendimi.

Gjatë fjalës së tij, ai theksoi se Golemi e meriton statusin e qytetit për shkak të numrit të popullsisë, zhvillimit urban dhe rëndësisë turistike, duke përmendur se me rreth 200 hotele zona përfaqëson një nga pikat më të rëndësishme të turizmit në vend. Sipas tij, ky zhvillim kërkon investime dhe shërbime më të mira për banorët dhe bizneset.

Balla foli gjithashtu për administrimin e të ardhurave dhe investimet e Bashkisë Kavajë, duke bërë një krahasim buxhetor me Bashkinë Lushnjë. Ai deklaroi se Kavaja ka të ardhura dy herë më shumë se Lushnja, por shtron rrugë dhjetë herë më pak, duke kërkuar që të ardhurat të përkthehen në investime konkrete dhe shërbime për qytetarët. Në përfundim, ai u shpreh se sfida mbetet rikthimi i bashkisë në funksion të qytetarëve.