Tamburella: Vendosja e ananasit në pica është fyerje për kulturën time

Shefi italian i kuzhinës Davide Tamburella u pushua nga puna në restorantin tashmë të mbyllur La Costa në Brisbane të Australisë, pasi refuzoi të përgatiste pica me ananas për mysafirët gjatë një aktiviteti. Ai e konsideroi përdorimin e këtij fruti si një fyerje ndaj kulturës së tij italiane, ndërsa pretendimi i tij për shkarkim të padrejtë u rrëzua nga institucionet përkatëse.

Përplasja mes kuzhinierit dhe drejtuesve të lokalit kishte nisur më herët për shkak të ankesave të përsëritura lidhur me vendosjen e përbërësve të caktuar në menunë e picave. Restoranti La Costa ndodhej në shtetin e Queenslandit, rajon ky që njihet si qendra kryesore e prodhimit komercial të ananasit në të gjithë Australinë. Në zonën e Bregut Diellor ndodhet edhe Ananasi i Madh, një strukturë prej fibre qelqi e lartë 16 metra e listuar në trashëgiminë kulturore lokale.

Vendimi i Komisionit Australian për Punë të Drejtë sqaron se shkarkimi i Tamburellës erdhi në maj, rreth dy javë pas një takimi me drejtuesit ku u diskutuan ankesat për sjelljen e tij. Institucioni bëri të ditur se kjo ishte hera e tretë në katër vjet që shefi i kuzhinës refuzonte përdorimin e ananasit në pica. Drejtuesit kishin marrë ankesa edhe për refuzimin e tij për të ofruar pica me proshutë dhe ananas gjatë një aktiviteti me mysafirë. Komisioni gjithashtu vërejti se ndaj tij pasuan shqetësime për përdorimin e gjuhës së ndyrë, mënyrën e komunikimit dhe rritjen e frustrimit në ambientin e punës. Gjatë muajit prill, ai pësoi edhe një lëndim ku theu kockat e dorës së djathtë duke goditur një parmak metalik. Drejtori menaxhues i restorantit, Elliot Ingram, deklaroi se ngjarja përmbante më shumë detaje sesa thjesht përbërësit e picës.

Pas largimit nga puna, restoranti ndërpreu gjithashtu procesin e aplikimit për vizën që do t'i mundësonte Tamburellës qëndrimin e përhershëm si punëtor i kualifikuar. Komisioni Australian për Punë të Drejtë e rrëzoi padinë e tij për shkarkim të padrejtë me arsyetimin se kërkesa u paraqit jashtë afatit të caktuar kohor. Aktualisht, profili i tij profesional tregon se ai është punësuar në një restorant tjetër në Brisbane, në menunë e të cilit nuk përfshihet ananasi.

Tamburella i kishte kërkuar më parë epërorit të tij që të verifikonte rëndësinë që ka për italianët mospërdorimi i ananasit në pica. Në profilin e tij në rrjetin profesional LinkedIn, ai ka shkruar se gjatë karrierës është fokusuar në «ofrimin e ushqimit të jashtëzakonshëm» dhe «përmirësimin e performancës së biznesit». Tre muaj më parë, ai kishte publikuar edhe një shkrim të titulluar «respektimi i përbërësve».