Studentët kërkojnë provimet profesionale edhe në shqip
Kërkesa e dorëzuar në Ministrinë e Drejtësisë përfshin provimin e jurisprudencës dhe ato të noterisë, duke u thirrur në ligjin për përdorimin e gjuhëve.
SHKUP — Studentët shqiptarë kanë ridorëzuar një kërkesë zyrtare në Ministrinë e Drejtësisë për të mundësuar dhënien e të gjitha provimeve shtetërore dhe profesionale edhe në gjuhën shqipe. Kjo kërkesë përfshin posaçërisht Provimin e Jurisprudencës, si dhe ato për noterë e përmbarues, të cilat aktualisht organizohen vetëm në gjuhën maqedonase.
Sipas organizatorëve, kufizimi i këtyre testimeve vetëm në maqedonishte bie ndesh me Ligjin për Përdorimin e Gjuhëve dhe përbën diskriminim të drejtpërdrejtë. Ata kërkojnë që institucionet përkatëse ta zbatojnë këtë ligj, duke garantuar të drejtat themelore për arsimim, certifikim profesional dhe ushtrim të lirë të profesionit.
Burim: TV21
— Redaksia ZHURMA
