Studentët e UP-së kualifikohen në gjysmëfinale të garës së debatit
Katër studentë të Departamentit të Psikologjisë dolën të suksesshëm në mesin e 16 ekipeve
PRISHTINË — Katër studentë të Departamentit të Psikologjisë të Universitetit të Prishtinës janë kualifikuar në gjysmëfinale në garën ndërkombëtare të debatit "Botta & Riposta World Cup", të organizuar nga Universiteti i Padovës në Itali. Sipas një njoftimi, studentët Jona Olloni, Dardan Bytyqi, Era Morina dhe Flandra Hasani dolën të suksesshëm në mesin e 16 ekipeve universitare nga vende të ndryshme të botës.
Në fazën e grupeve, ekipi ynë regjistroi tri fitore radhazi, duke mposhtur ekipet e Francës, Sllovakisë dhe ekipin e kombinuar Indonezi–Indi. Sukseset individuale janë po aq mbresëlënëse: Jona Olloni u vlerësua si debatuesja më e mirë në prolog gjatë fazës së grupeve. Flandra Hasani u shpall tri herë rradhazi oratore e debatit.
Ekipi i Kosovës u vlerësua si ekipi më i mirë në fazën e grupeve. Në gjysmëfinale, ky ekip i UP-së do të përballet me atë të Italisë. "Ky rezultat është dëshmi e përkushtimit, profesionalizmit dhe potencialit të jashtëzakonshëm të studentëve tanë. Departamenti i Psikologjisë u uron shumë suksese në vazhdim dhe është krenar për përfaqësimin dinjitoz që po i bëjnë universitetit dhe Kosovës në arenën ndërkombëtare."
Burim: Kallxo
— Redaksia ZHURMA