S’ka kërkesë zyrtare për amnisti, ndërtimi në Idrizovë ka ngecur

Në Ministrinë e Drejtësisë ende nuk është dorëzuar kërkesë zyrtare për amnisti apo falje të të burgosurve me qëllim të shkarkimit të burgjeve nga mbingarkesa, çështje kjo e hapur për shkak të mungesës së kapaciteteve dhe kushteve të tmerrshme. Nga Ministria e Drejtësisë bëjnë të ditur se deri më tani nuk është dorëzuar asnjë kërkesë zyrtare apo iniciativë formale nga Drejtoria për Ekzekutimin e Sanksioneve për miratimin e një ligji të ri për amnisti, dhe se do të veprojnë në përputhje me legjislacionin në fuqi në rast se paraqitet një iniciativë e tillë. Drejtoria për Zbatimin e Sanksioneve nuk ka dhënë përgjigje nëse do të mbështesë një nismë për amnisti, e cila është në kundërshtim me rekomandimet e Avokatit të Popullit, i cili zgjidhjen e problemit e sheh nëpërmjet zgjerimit të kapaciteteve.

Për këtë qëllim, Ministria e Transportit ka njoftuar se me mjete evropiane do të zgjerohen kapacitetet në burgun më të madh të vendit në Idrizovë. Megjithatë, procedura ka ngecur në fazën e tenderimit pasi ka dështuar një herë. Sipas dokumentacionit të publikuar në faqen evropiane për tenderime publike, ndërtimi i hapësirave të reja me kapacitet prej 420 shtretërve duhet të zgjasë 72 muaj nga fillimi i punimeve, duke parashikuar një objekt të ri për repartin e burrave, një repart të ri paraburgimi dhe objekte të reja për kuzhinë dhe lavanderi. Deri në zgjerimin e kapaciteteve, të burgosurit vazhdojnë të vuajnë dënimet në kushte çnjerëzore që ndikojnë edhe te marrëdhëniet sociale mes tyre.

Komisioni Evropian, në raportin për Maqedoninë e Veriut për vitin 2025, ka kërkuar përmirësim urgjent të kushteve të burgimit dhe përdorim më të gjerë të alternativave ndaj burgimit, përkatësisht probacionit. Ndërkaq, sipas një analize të Shoqatës Maqedonase të Penologjisë të publikuar në vitin 2023 lidhur me ndikimin e amnistisë, përvojat tregojnë se pa risocializim të të burgosurve nuk ka efektivitet afatgjatë.