Pse bashkohen sipërmarrësit shqiptaro-zviceranë në Cyrih?
Sipërmarrësit Gëzim Hasani dhe Esat Lika ishin mes të pranishmëve, ndërsa mysafirë nderi ishin ambasadorët Gingrich dhe Latifi.
CYRIH — Ngjarja e organizuar nga Sport Business Network në bashkëpunim me Ambasadën e Shteteve të Bashkuara në Zvicër mblodhi në Cyrih elitën e biznesit, diplomacisë dhe sportit, për të shënuar 250-vjetorin e Deklaratës së Pavarësisë së SHBA-së, partneritetin e gjatë mes Zvicrës dhe SHBA-së, si dhe rrugëtimin drejt Kampionatit Botëror FIFA 2026, që po zhvillohet në SHBA, Kanada dhe Meksikë.
Ndër të pranishmit ishin sipërmarrësit shqiptaro-zviceranë Gëzim Hasani, CEO i smzh AG, dhe Esat Lika, CEO i Lika Group. Ndër mysafirët e nderit ishin ambasadorja amerikane Callista L. Gingrich dhe ambasadori i Kosovës në Zvicër, Mentor Latifi.
Paneli kryesor përfshiu Gary Nagle, CEO i Glencore, kampionen olimpike zvicerane Corinne Suter dhe ish-ndihmëstrajnerin e kombëtares së Zvicrës, Giorgio Contini, të cilët diskutuan mbi lidershipin, biznesin dhe sportin. Ndër të pranishmit ishte edhe ish-piloti i Formula 1, Nick Heidfeld.
Prania e sipërmarrësve shqiptaro-zviceranë në këtë nivel dëshmon pozicionin gjithnjë e më të rëndësishëm të diasporës shqiptare në rrjetet elitare të Zvicrës.
Sport Business Network u themelua nga sipërmarrësi shqiptaro-zviceran Besfort Bilalli dhe vazhdon të konsolidohet si platformë që lidh liderë të sportit, biznesit dhe institucioneve. Ngjarja në Cyrih konfirmoi edhe një herë rolin e SBN-së si një nga platformat më prestigjioze të networking-ut në Zvicër.
Burim: Albinfo.ch
— Redaksia ZHURMA