Siljanovska-Davkova: Obligimet klimatike t’i kthejmë në investime

Presidentja Gordana Siljanovska-Davkova ka kërkuar veprim të përbashkët dhe urgjent përballë ndryshimeve klimatike, të cilat i ka cilësuar si një krizë që përfshin të gjitha shtresat e shoqërisë. Gjatë fjalimit të mbajtur në ngjarjen e organizuar nga UNDP së bashku me institucionet vendore, përfshirë Ministrinë e Mjedisit dhe Planifikimit Fizik dhe atë të Energjisë, Minierave dhe Burimeve Minerale, ajo ka bërë thirrje për miratimin sa më të shpejtë të Ligjit për Veprimin Klimatik.

Sipas Siljanovska-Davkovës, ky dokument përbën një nga pikat kyçe të agjendës së reformave drejt integrimit evropian dhe ka marrë tashmë vlerësim pozitiv nga Komisioni Evropian për harmonizimin me legjislacionin e Bashkimit Evropian. Ajo ka shtuar se në konferencën COP31 në Antalia, ku do të drejtojë delegacionin shtetëror të RMV-së, vendi duhet të dalë me prioritete të qarta, projekte të përgatitura dhe nevoja të përcaktuara për financim.