Si po tentohet të përçahet protesta në Tiranë?

TIRANË — Eksperti i IT-së, Gent Progni, i cili po ndihmon në organizimin e protestave qytetare në kryeqytet, ka denoncuar presionet dhe përpjekjet e pushtetit për të përçarë revoltën popullore. Gjatë një interviste në "News24", ai shpjegoi se që prej ditëve të para janë aktivizuar patronazhistët.

Progni bëri të ditur se ndaj tij dhe protestuesve po përdoren profile false për të shpërndarë lajme të rreme. Ai përmendi si shembull shpifjet se po hetohet nga SPAK, duke sqaruar se këto synojnë të frikësojnë njerëzit që të largohen nga sheshi ku Tirana marshonte për të kërkuar llogaridhënie.

Sipas tij, sulmet vijnë nga narrative që përpiqen ta etiketojnë atë herë si të majtë e herë si të djathtë. Ai tregoi se ka marrë mesazhe që e pyesnin pse kërkon vetëm burgosjen e Edi Ramës dhe Belinda Ballukut, duke e akuzuar se po harron Berishën.

Përveç patronazhistëve, eksperti theksoi se po shfaqen grupe të reja që përpiqen me çdo kusht të kapin drejtimin e protestës apo të ulin ata që janë të vërtetë aty. Ai shtoi se përçarja ka dështuar falë frymës së rinisë dhe studentëve që thyen frikën e intimidimit shtetëror.

Megjithëse largimi nga vendi po u ofrohet si zgjidhja e vetme, Progni deklaroi se do të qëndrojë për t'i rritur fëmijët në atdhe. Ai u shpreh i vendosur të mos pranojë asnjë ndërhyrje në këtë revoltë qytetare.

Burim: Almakos
— Redaksia ZHURMA