Si mund të shndërrohet bashkëpunimi ndërshqiptar në projekte konkrete?
Pse konferenca rajonale në Shkup thekson nevojën për angazhim të të rinjve në politikë dhe vendimmarrje?
SHKUP — Konferenca rajonale “Diplomacia rinore si instrument i bashkëpunimit ndërshqiptar dhe integrimit evropian” u mbajt në Shkup, ku u theksua se bashkëpunimi ndërshqiptar nuk duhet të mbetet vetëm në deklarata politike, por të shndërrohet në projekte konkrete në arsim, kulturë, ekonomi dhe fuqizimin e të rinjve.
Në aktivitet morën pjesë përfaqësues politikë, akademikë dhe të rinj nga Shqipëria, Kosova, Maqedonia e Veriut, Mali i Zi dhe Lugina e Preshevës. Kryetari i Komunës së Çairit dhe bashkëkryetari i VLEN-it, Izet Mexhiti, theksoi se bashkëpunimi nuk mund të mbetet vetëm slogan patriotik ose fotografi të përbashkëta.
“Bashkëpunimi kombëtar duhet të shndërrohet në politika të zbatueshme, projekte të përbashkëta dhe rezultate të prekshme që i ndiejnë qytetarët, veçanërisht të rinjtë shqiptarë kudo që jetojnë. Nëse duam të ndërtojmë një agjendë të përbashkët, duhet të fillojmë nga ato fusha që na bashkojnë më shumë se sa na ndajnë,” tha Mexhiti.
Kryetari i Lëvizjes “Shqipëria Bëhet”, Adriatik Lapaj, shtoi se dallimet politike dhe ideologjike nuk duhet të pengojnë bashkëpunimin për çështjet madhore. “Ne mund të jemi kundërshtar politik, mund të mendojmë ndryshe, por përtej kësaj, kur vinë puna të gjëra madhore, duhet të jemi bashkë,” theksoi ai.
Deputeti i Lëvizjes Vetëvendosje, Egzon Azemi, theksoi se ndryshimet shoqërore historikisht janë arritur përmes angazhimit aktiv qytetar, jo vetëm përmes përfaqësimit periodik në zgjedhje. “Të drejtat madhore si e drejta e votës u fituan pas dekadash protestash, peticionesh dhe organizimesh. Të drejtat e punëtorëve për pagën minimale u arritën vetëm pas protestave masive dhe grevave radikale,” tha Azemi.
Pjesëmarrësit vlerësuan se përfshirja e të rinjve në politikë dhe krijimi i urave të bashkëpunimit rajonal janë elemente kyçe për një qasje të përbashkët ndërshqiptare dhe për proceset integruese evropiane. Konferenca shërbeu si platformë për të diskutuar rrugët e mundshme për të realizuar këto synime.
Burim: TV21
— Redaksia ZHURMA