Si do të mbrohet Bogovina nga përmbytjet?

BOGOVINË — Ministria e Mjedisit Jetësor dhe Planifikimit Hapësinor po financon me rreth 60 milionë denarë tre projekte infrastrukturore në Komunën e Bogovinës: ndërtimin e kanalit për ujërat atmosferikë në Pirok, rregullimin e shtratit të lumit Kusha në Pallçisht të Poshtëm dhe rregullimin e shtratit të lumit në Kamjan, që do të fillojë së shpejti.

Ministri Muamet Hoxha i inspektoi sot projektet gjatë një vizite pune, shoqëruar nga kryetari i Bogovinës, Feti Abazi, dhe zëvendësministrja e Transportit dhe Lidhjeve, Kaltrina Zekolli Shaqiri. Sipas Ministrisë, punimet sigurojnë mbrojtje më të mirë nga ujërat atmosferikë dhe të rrëmbyeshme, si dhe zvogëlojnë rreziqet nga përmbytjet.

Këto punime krijojnë gjithashtu kushte më të sigurta jetese për popullatën lokale, thotë Ministria. Ajo vazhdon të investojë në projekte të ngjashme në mbarë vendin, pasi investime të tilla kapitale vendosin themelet e kthesës së gjelbër dhe kontribuojnë në zhvillim të qëndrueshëm e në një mjedis më cilësor jetësor për qytetarët.

Burim: Tetova Sot
— Redaksia ZHURMA