Shtatë emigrantë vdesin afër Ishujve Kanari, mbi 380 të tjerë shpëtohen

Së paku shtatë emigrantë kanë humbur jetën në ujërat afër Ishujve Kanari të Spanjës, ndërsa më shumë se 380 të tjerë janë shpëtuar nga shërbimet e shpëtimit detar, thanë autoritetet spanjolle. Gjatë operacioneve të hënën, roja bregdetare gjeti dy trupa të pajetë në një barkë emigrantësh, nga e cila u shpëtuan 132 persona, rreth 150 kilometra larg Ishullit Lanzarote. Sipas autoriteteve, gjatë lundrimit të njëjtë pesë emigrantë të tjerë kishin vdekur dhe ishin hedhur në det. Më herët gjatë të hënës, 250 emigrantë të tjerë u shpëtuan nga barkat e rojës bregdetare afër ishujve Lanzarote dhe El Hierro, ndërsa një ditë më parë, të dielën, ishin shpëtuar 107 persona afër Ishullit El Hierro, sipas të dhënave të raportuara nga agjencia e lajmeve Reuters.

Rruga detare nga Afrika Perëndimore drejt Ishujve Kanari konsiderohet ndër më të rrezikshmet dhe më vdekjeprurëset në botë. Çdo vit, mijëra emigrantë përpiqen ta kalojnë oqeanin me barka të mbingarkuara, duke rrezikuar jetën për të arritur në territorin spanjoll përmes valëve të ashpra dhe rrymave të forta ujore. Edhe pse numri i emigrantëve që kanë mbërritur deri më tani këtë vit ka shënuar rënie krahasuar me periudhën e njëjtë të vitit të kaluar, muaji tetor ka sjellë një rritje të ndjeshme të udhëtimeve për shkak të kushteve më të favorshme në det, duke shtuar presionin ndaj shërbimeve të pranimit dhe emergjencës në ishuj.

Pas kësaj tragjedie ka reaguar presidenti i Ishujve Kanari, Fernando Clavijo, i cili ka shkruar në rrjetin X se rruga e Atlantikut po vazhdon të marrë jetë njerëzish. Clavijo u shpreh se «Parashikimet më të këqija po bëhen të vërteta. Rruga e Atlantikut edhe një herë po merr jetë, kësaj radhe afër bregdetit të Lanzarotes. Pas secilit është një jetë, një tregim dhe një familje».