Pse riafirmuan Shqipëria mbështetjen për sovranitetin e Ukrainës?

TIRANË — Presidenti i Republikës, Bajram Begaj, mori pjesë në Samitin Ukrainë–Evropa Juglindore në Kiev, si edhe në ceremonitë për Ditën e Shtetformimit të Ukrainës. Kreu i shtetit riafirmoi mbështetjen e Shqipërisë për sovranitetin, integritetin territorial, rimëkëmbjen dhe integrimin evropian të Ukrainës.

"Shqipëria ka qenë e qartë dhe e palëkundur në mbështetjen e saj për Ukrainën. Ne qëndrojmë në mbështetje të pavarësisë, sovranitetit dhe integritetit tuaj territorial brenda kufijve tuaj të njohur ndërkombëtarisht. Gjithashtu, mbështesim arritjen e një paqeje gjithëpërfshirëse, të drejtë dhe të qëndrueshme, që respekton Kartën e Kombeve të Bashkuara, të drejtën ndërkombëtare dhe të drejtat legjitime të popullit ukrainas", – deklaroi Presidenti i Republikës.

Mesazhet e Presidentit Begaj në samit u fokusuan në forcimin e bashkëpunimit për siguri dhe qëndrueshmëri përballë kërcënimeve të përbashkëta, mbështetjen për rimëkëmbje dhe rindërtim transparent dhe të qëndrueshëm, si edhe avancimin e perspektivës evropiane të Ukrainës dhe rajonit, të parë si investim strategjik për paqe, stabilitet dhe të ardhmen e përbashkët evropiane. Në praninë e liderve të Evropës Juglindore dhe të Presidentes së Komisionit Evropian, Ursula von der Leyen, Begaj kërkoi që mbështetja për Ukrainën të shoqërohet me hapa konkretë. "Mbështetja jonë duhet të shkojë përtej deklaratave dhe të përkthehet në bashkëpunim praktik. Kjo është arsyeja pse Samiti ka rëndësi: të forcojmë koordinimin politik, të thellojmë solidaritetin rajonal dhe të identifikojmë fusha konkrete për veprim të përbashkët", theksoi ai.

Samiti u mbyll me një deklaratë të përbashkët ku liderët riafirmuan unitetin e vendeve të Evropës Juglindore me Ukrainën dhe vlerësuan sigurinë e saj si pjesë të sigurisë së gjithë Evropës. Gjatë ceremonive për Ditën e Shtetformimit, Presidenti Begaj nderoi qëndrueshmërinë e popullit ukrainas: "Në këtë ditë solemne, le të nderojmë gjithashtu guximin e popullit ukrainas – ushtarëve, civilëve, familjeve, mjekëve, mësuesve, ekipeve të shpëtimit dhe vullnetarëve, të cilët vazhdojnë të dëshmojnë një forcë të jashtëzakonshme përballë vuajtjeve. Qëndrueshmëria e tyre është frymëzim për të gjithë ata që besojnë te liria dhe drejtësia."

Presidenti i Republikës Bajram Begaj gjatë qëndrimit të tij në Kiev zhvilloi edhe një takim kokë më kokë me Presidentin Volodymyr Zelensky. Dy liderët diskutuan forcimin e bashkëpunimit dypalësh, mbështetjen për Ukrainën në rimëkëmbje, siguri dhe zhvillim ekonomik, si edhe mundësitë për marrëveshjeve të reja. Presidenti Begaj rikonfirmoi solidaritetin e plotë të Shqipërisë me Ukrainën dhe angazhimin për forcimin e marrëdhënieve mes dy vendeve.

Burim: Gazeta Tema, https://www.gazetatema.net/politika/begaj-takon-zeleskyn-ne-kiev-riafirmojme-mbeshtetjen-per-sovranitetin--i573914
— Redaksia ZHURMA