Protestë kombëtare e studentëve para Ministrisë së Arsimit

Studentët dhe të rinjtë kanë organizuar një protestë kombëtare përpara Ministrisë së Arsimit në Tiranë, duke u bërë thirrje studentëve nga të gjitha qytetet dhe qytetarëve të bashkohen në tubim për të ngritur zërin kundër problematikave që prekin të rinjtë. Pjesëmarrja në tubim është cilësuar si tepër e lartë.

Organizatorët kanë shprehur pakënaqësi për çështjet që sipas tyre mbeten të pazgjidhura dhe për mungesën e reagimit nga institucionet, duke përmendur kryesisht kërkesat e vitit 2018 dhe dorëheqjen e kryeministrit Edi Rama. Gjatë protestës, me praninë e flamujve kombëtarë, janë lëshuar thirrje si «Dorëheqje», «Studentët kërkojnë revolucion», «Bashkohuni studentë», «Duam kushte, duam dije, jo pallavra qeverie» dhe «Kur zgjohet rinia, bie qeveria». Të rinjtë kanë mbushur rrugën e Durrësit duke hedhur vezë, letra higjienike, bojë, kapsolla dhe duke shfaqur pankarta kundër qeverisë.

Protesta është shoqëruar me prani të shtuar të forcave të policisë dhe një autoboti me ujë pranë godinës. Njëri nga studentët deklaroi për mediat se protesta do të vijojë edhe në ditët në vijim, ndërkohë që është diskutuar edhe bojkotimi i leksioneve.