Sa paguajnë shqiptarët për internetin celular krahasuar me Ballkanin?
Kostoja mesatare e shportës mujore të internetit për vitin 2025 në Shqipëri ishte 1.69% e të ardhurave bruto, vlera më e lartë në rajon.
Shqipëria regjistron koston më të lartë të internetit nga rrjetet celulare në raport me të ardhurat në rajonin e Ballkanit Perëndimor. Sipas të dhënave të Unionit Ndërkombëtar të Telekomunikacioneve (ITU), të cituara nga AKEP, kostoja mesatare e shportës mujore të internetit me brez të gjerë për vitin 2025 në Shqipëri ishte 1.69% e të ardhurave mujore bruto (GNI).
Kjo shifër e pozicionon Shqipërinë ndjeshëm mbi vendet e rajonit, ku Maqedonia e Veriut renditet e dyta me 1.31%, ndjekur nga Bosnjë-Hercegovina me 1.17%, Mali i Zi me 1.01% dhe Serbia me 0.96%. Gjithashtu, kostoja shqiptare kalon mesataren botërore, e cila qëndron në nivelin 1.38% e GNI.
Në shportën e komunikimit me përdorim të lartë (140 minuta, 20 SMS dhe 5 GB), Shqipëria është vendi i dytë më i shtrenjtë në rajon me 1.95% të GNI, pas Maqedonisë së Veriut (2.1%). Në këtë segment, Shqipëria mbetet mbi mesataren botërore prej 1.54%, ndërsa Mali i Zi regjistron koston më të ulët me 1.01%.
Analizat e AKEP tregojnë se ndërsa shportat celulare janë pranë pragut të përballueshmërisë prej 2% të GNI, interneti fiks ka shënuar një përmirësim gradual. Kostoja e broadband-it fiks zbriti nga 2.31% në vitin 2024 në rreth 2.08% në vitin 2025, duke u afruar me kufirin e pranueshëm të përballueshmërisë.
Rritja graduale e çmimeve të komunikimit pas vitit 2023 përkon me transformimin e tregut në një duopol. Pas një periudhe konkurrence të ashpër dhe fitimesh të dobëta, përqendrimi i tregut në dy operatorë të vetëm po u lejon kompanive të korrigjojnë çmimet dhe të përmirësojnë parametrat e tyre financiarë.
Ky konsolidim ka sjellë reduktim të numrit dhe larmishmërisë së paketave, sidomos në segmentin me parapagesë. Megjithatë, shumica e ofertave mbeten të integruara, duke kombinuar telefoninë, SMS-të dhe internetin me vlefshmëri të ndryshme, ndërkohë që ofertat për përdorim të lartë rezultojnë më konkurruese se shërbimet bazë.
Në këtë kontekst, Kryetari i Komisionit të Konkurrencës, Denar Biba, paralajmëroi se do të ketë ndryshime serioze në kontratat e operatorëve. Autoriteti i Konkurrencës po heton Vodafone Albania dhe One Albania, duke synuar veçanërisht klauzolën e indeksimit vjetor të çmimeve që lejon rritjen e tarifave sipas kontratave të miratuara nga AKEP.
Burim: Monitor
— Redaksia ZHURMA