Shpella e Gadimës tërheq turistë nga mbarë bota — bileta kushton vetëm 2 euro
Bileta kushton vetëm dy euro, ndërsa në botë ekzistojnë gjithsej vetëm gjashtë shpella të ngjashme me të.
GADIME — Shpella e Gadimës, e njohur për kristalet e rralla të mermerit dhe historinë prej rreth 80 milionë vjetësh, vazhdon të jetë një nga destinacionet turistike më të vizituara në Kosovë, duke tërhequr vizitorë nga e gjithë bota, thotë drejtoresha e shpellës, Adriana Pllana, për Koha.net.
Historia e zbulimit të saj nisi rastësisht në vitin 1966, kur një banor i zonës, teksa punonte për ndërtimin e shtëpisë së tij, ra në një gropë të thellë nëntokësore. Pasuria që e bën shpellën unike është prania e aragoniteve, formacione të rralla brenda shpellave.
Rrugëtimi brenda shpellës vazhdon në të ashtuquajturën sallë koncertale, e cila e mori emrin nga studentët që dikur mbanin koncerte aty dhe që sot i ngjan një amfiteatri natyror. Vëmendjen e vizitorëve e tërheq veçanërisht një formacion që i ngjan hartës së Kosovës, një nga pikat më të veçanta të shpellës.
Me të hyrë më thellë, uji mbetet magjia kryesore e shpellës, me një liqen të vogël nëntokësor dhe rrjedha të ngadalta që formojnë "Fontanën e dëshirave", vend i lidhur me besime e tradita popullore. Formacione të tjera njihen si "Zemra e Shpellës" dhe "Mjekra e Skënderbeut", ndërsa dy kristale përballë njëri-tjetrit mbajnë emrin "Romeo dhe Zhulieta".
Studiuesit vlerësojnë se shpella u krijua rreth 80 milionë vjet më parë. Drejtoresha Pllana thotë se investimet vazhdojnë dhe planifikohen edhe më shumë, ndërsa vizitorët paguajnë vetëm dy euro për biletë. Sipas saj, në botë ekzistojnë gjithsej vetëm gjashtë shpella si kjo.
Burim: Koha.net
— Redaksia ZHURMA
