Shiroka Pula takon ambasadorin austriak pas bisedës me diplomaten e SHBA

Presidentja e Republikës së Kosovës, Justina Shiroka-Pula, ka pritur në takim të ngarkuarën me punë të Shteteve të Bashkuara të Amerikës në Kosovë, Anu Prattipati, për të diskutuar rreth zhvillimeve aktuale politike. Sipas njoftimit të Presidencës, gjatë këtij takimi ajo ka vlerësuar dinamikën e shtuar të punës së Kuvendit dhe Qeverisë pas tejkalimit të krizës institucionale, duke theksuar rëndësinë e stabilitetit institucional dhe funksionimit të plotë të institucioneve, ndërsa ka nënvizuar se Shtetet e Bashkuara të Amerikës mbeten partner strategjik i pazëvendësueshëm i Kosovës.

Gjatë së njëjtës ditë, Shiroka-Pula ka zhvilluar një takim edhe me ambasadorin e Austrisë në Kosovë, Giorg Shnetzar, me të cilin ka biseduar për marrëdhëniet ndërmjet dy vendeve, bashkëpunimin politik e ekonomik, si dhe mbështetjen e Austrisë në rrugëtimin euroatlantik të Kosovës. Ajo ka vlerësuar rëndësinë e investimeve direkte austriake në zhvillimin e ekonomisë së vendit dhe ka shprehur bindjen se miqësia e qëndrueshme dhe besimi i ndërsjellë do të thellohen edhe më tej nëpërmjet bashkëpunimit institucional.