Sheiku Al Nahyan pret në takim biznesmenin shqiptar Dorian Duçka në Abu Dabi

Biznesmeni shqiptar Dorian Duçka është pritur në një mexhlis tradicional dhe në një drekë pune në pallatin e Sheikut Nahayan Mabarak Al Nahyan në Abu Dabi. Pritja nga Ministri i Tolerancës dhe Bashkëjetesës i Emirateve të Bashkuara Arabe vjen në kontekstin e zhvillimeve diplomatike në rajon, ku qyteti priti edhe bisedimet mes Ukrainës, Rusisë dhe Shteteve të Bashkuara të Amerikës.

Ky zhvillim pason përfundimin e bisedimeve diplomatike me ndërmjetësimin e Uashingtonit që u mbajtën në kryeqytetin e Emirateve të Bashkuara Arabe lidhur me konfliktin mes Ukrainës dhe Rusisë.

Lajmin për vizitën e ka bërë të ditur vetë Duçka përmes një postimi në rrjetet sociale, ku ka publikuar edhe një fotografi nga takimi zyrtar në pallatin e ministrit. Duçka njoftoi se ishte ftuar në një mbledhje tradicionale të njohur si mexhlis, si dhe në një drekë në pallatin e sheikut. Ai u ndal edhe te rëndësia që po merr Abu Dabi në diplomacinë ndërkombëtare, duke përmendur bisedimet e zhvilluara atje mes përfaqësuesve të Rusisë, Ukrainës dhe SHBA-së, si dhe rolin e vendeve të Gjirit në promovimin e dialogut dhe pajtimit.

“Jam vërtet i nderuar që jam ftuar në një Mexhlis dhe në një drekë në pallatin e Shkëlqesisë së Tij, Sheikut Nahayan Mabarak Al Nahyan, Ministër i Tolerancës dhe Bashkëjetesës i Emirateve të Bashkuara Arabe, në Abu Dhabi. Mirënjohës për mikpritjen e ngrohtë dhe bisedat kuptimplota”, shkruan Duçka në reagimin e tij.

Në lidhje me rolin e rajonit, biznesmeni shtoi: “Një rast i veçantë në një qytet që po luan një rol gjithnjë e më të rëndësishëm në diplomacinë globale, përfshirë bisedimet e fundit midis Rusisë, Ukrainës dhe Shteteve të Bashkuara. Një kujtesë në kohën e duhur për rolin e rëndësishëm që vendet e Gjirit luajnë në promovimin e tolerancës, dialogut dhe pajtimit, duke ndërtuar ura në një botë gjithnjë e më të përçarë”.