Sharon Osbourne u bën thirrje fansave të dëgjojnë muzikën e Ozzy-t sa më fort
Bashkëshortja e Ozzy-t kujton artistin për humorin dhe energjinë e tij
Londra — Bashkëshortja e Ozzy Osbourne, Sharon Osbourne, u ka bërë thirrje fansave ta kujtojnë artistin duke dëgjuar muzikën e tij "sa më fort të jetë e mundur". Në një intervistë emocionale për BBC, Sharon tha se dëshira e Ozzy-t ishte që njerëzit ta kujtonin për humorin, sinqeritetin dhe energjinë e tij.
Sharon e përshkroi bashkëshortin e saj si një njeri autentik, që nuk përpiqej kurrë të ishte dikush tjetër. "Ai ishte i sinqertë, me zemër të madhe dhe jashtëzakonisht qesharak. Edhe pas debateve më të mëdha, përfundonim duke qeshur, sepse gjithmonë thoshte diçka aq absurde sa nuk mund ta përmbanim të qeshurën", u shpreh ajo.
Ozzy Osbourne, i njohur si "Princi i Errësirës", ndërroi jetë më 22 korrik të vitit të kaluar, në moshën 76-vjeçare, vetëm pak javë pas koncertit lamtumirës "Back to the Beginning" në Birmingham. Artisti kishte vuajtur prej vitesh nga probleme shëndetësore dhe në vitin 2019 ishte diagnostikuar me sëmundjen e Parkinsonit.
Sharon konfirmoi se familja do të vazhdojë të mbështesë organizatat bamirëse që përfituan nga koncerti i fundit i Ozzy-t, përfshirë Cure Parkinson's, Acorns Children's Hospice dhe Birmingham Children's Hospital, duke theksuar se lufta për gjetjen e një kure ndaj Parkinsonit do të vazhdojë.
Ajo shprehu gjithashtu dëshirën që "Ozzy Day", i organizuar për herë të parë në Birmingham, të kthehet në një traditë të përvitshme. "Kjo është vendlindja e metalit. Është shtëpia e Ozzy-t. Ai e donte këtë qytet dhe ishte krenar që ishte nga Birminghami", tha Sharon.
Duke kujtuar koncertin e fundit të bashkëshortit të saj, ku performuan emra si Metallica, Guns N' Roses dhe Slayer, ajo e cilësoi atë si një moment të paharrueshëm për familjen. "Ishte e mrekullueshme të shihje gjithë atë dashuri dhe respekt për Ozzyn. Ishte diçka që do ta mbajmë gjithmonë në zemër", përfundoi ajo.
Burim: KultPlus, https://kultplus.com/sharon-osbourne-ne-pervjetorin-e-vdekjes-se-ozzy-t-kujtojeni-duke-e-leshuar-muziken-sa-me-fort/
— Redaksia ZHURMA