Si mund të ndryshojë roli i Shqipërisë në Kosovë nëse SHBA tërheqin trupat?
Eksperti amerikan i Ballkanit paralajmëron reduktim të mundshëm të pranisë amerikane dhe propozon që Shqipëria, anëtare e NATO-s, të marrë më shumë përgjegjësi ushtarake.
PRISHTINË — Profesori amerikan Daniel Serwer ka paralajmëruar se prania ushtarake e Shteteve të Bashkuara në Kosovë mund të reduktohet në të ardhmen, duke i bërë thirrje vendit të përgatitet për këtë skenar. Në një intervistë për A2CNN, Serwer tha se ndonëse do të dëshironte më shumë trupa amerikane, "s'do habitesha edhe nëse do të kishte ndonjë tërheqje".
Sipas ekspertit të Ballkanit, në një skenar të tillë Shqipëria si anëtare e NATO-s mund të luajë rol më të madh në garantimin e sigurisë. "Ndoshta mund ta dini që Shqipëria duke qenë anëtare e NATO-s, mund të vërë më shumë trupa në Kosovë dhe të ruajë fqinjin e vet", deklaroi ai.
Serwer theksoi se për Kosovën prioritet mbetet anëtarësimi në NATO dhe BE, duke shtuar se ky i fundit "do të zgjidhte shumë nga sfidat e sigurisë". Megjithatë, ai ngriti dilema për gatishmërinë politike të vendit: "A po ndodh sot? Vështirë ta themi, që NATO të pranojë një anëtar të ri pa një qeveri të qëndrueshme".
Eksperti gjithashtu akuzoi presidentin serb Aleksandar Vuçiq se "po pret për një mundësi gjeopolitike" për të marrë "të paktën veriun e Kosovës", duke argumentuar se Serbia nuk synon pjesën tjetër për shkak të rrezikut të një "lufte guerrile shkatërruese".
Burim: Zëri
— Redaksia ZHURMA