Sa të rëndë është dënimi me 6 vjet për spiunazh në favor të Serbisë?

PRISHTINË — Reagimi i ashpër i Asllan Dibranit ndaj vendimit të Gjykatës Speciale për dënimin e Hysri Selimit me 6 vjet burg për spiunazh në favor të BIA-s serbe ka ngritur pyetje për adekuatetin e dënimit ndaj rrezikut që paraqet ky rast për sigurinë kombëtare.

Sipas aktakuzës së Prokurorisë Speciale, Selimi u rekrutua nga shërbimi serb që në vitin 2009, u pagua dhe u pajis me mjete komunikimi për të mbledhur informacione të ndjeshme mbi Kosovën, UÇK-në dhe persona të radikalizuar. Dibrani thekson se kjo nuk është një vepër e zakonshme penale, por një sulm i drejtpërdrejtë kundër Republikës së Kosovës.

"Ky është alarm kombëtar," shkruan Dibrani, duke vënë në dukje se Selimi përfaqëson modelin më të rrezikshëm të infiltrimit: përdorimi i radikalizmit fetar dhe rrjeteve ideologjike nga shërbimet armiqësore për të goditur Kosovën nga brenda. Ai shton se Kosova nuk u çlirua për t’u lënë spiunët të veprojnë lirshëm në emër të fesë ose ideologjive të errëta.

Dënimi me 6 vjet burgim konsiderohet "tepër i butë" nga Dibrani, duke marrë parasysh se, sipas Prokurorisë, veprimet e Selimit kanë rrezikuar rendin kushtetues dhe sigurinë e shtetit. Ai kërkon që tradhtia ndaj atdheut të trajtohet si krim i rëndë kundër kombit, jo si gabim personal.

Dibrani kërkon veprime të menjëhershme nga institucionet: rishikim i dënimit në instancat më të larta, hetim i të gjithë rrjetit të bashkëpunëtorëve të mundshëm të BIA-s në Kosovë, zbardhje e rolit të strukturave që kanë përdorur radikalizmin si instrument politik dhe forcim i ligjeve kundër spiunazhit dhe ndikimeve armiqësore.

Ai thekson se ky nuk është sulm ndaj fesë, por kundër spiunazhit dhe radikalizmit politik që përdor fenë si maskë për misione antishtetërore. "Kosova ka nevojë për drejtësi të fortë, jo për dënime që i japin zemër tradhtisë," shkruan Dibrani, duke kërkuar dënim maksimal për ata që punojnë kundër shtetit.

Burim: Fjala
— Redaksia ZHURMA