Sa raste të reja me HIV janë konfirmuar në Kosovë këtë vit?
Sipas IKSHPK-së, gjatë gjashtë muajve të parë janë raportuar 17 raste me HIV/AIDS, ndërsa tre pacientë po trajtohen aktualisht në Klinikën Infektive.
PRISHTINË — Në gjashtë muajt e parë të këtij viti, në Kosovë janë konfirmuar zyrtarisht 17 raste të reja të personave të infektuar me virusin HIV/AIDS. Ky numër tregon një rritje të lehtë në krahasim me të njëjtën periudhë të vitit të kaluar, kur ishin raportuar 13 raste.
Aktualisht, në Klinikën Infektive të Qendrës Klinike Universitare të Kosovës po trajtohen tre pacientë të shtrirë. Sipas zyrtarëve shëndetësorë, njëri prej tyre ndodhet në gjendje më të rëndë shëndetësore, ndërsa dy pacientët e tjerë janë në gjendje më të stabilizuar dhe po marrin terapinë e nevojshme.
Shefi i repartit në Klinikën Infektive, Murat Mehmeti, ka paralajmëruar se me këtë trend të përhapjes së virusit, shifrat e rasteve të reja mund të dyfishohen deri në fund të vitit. Ai vuri në dukje se gjatë vitit të kaluar u shënuan rreth 27 raste të reja gjithsej.
Infektologu Mehmeti theksoi se për dallim nga vitet e kaluara, kur klinika ishte përballur me mungesë të theksuar të medikamenteve për trajtimin e këtij virusi, këtë vit situata me furnizimin e barnave është e mirë dhe stabile për të gjithë pacientët që kanë nevojë.
Megjithatë, ai shtoi se nëse sëmundja avancon shumë ose zbulohet në një fazë shumë të vonshme, përkundër terapisë është e vështirë që të mbijetojnë rastet e tilla. Prandaj, diagnostikimi i hershëm mbetet vendimtar për efikasitetin e trajtimit mjekësor të këtij infeksioni të rëndë.
Të dhënat historike nga Instituti Kombëtar i Shëndetësisë Publike të Kosovës tregojnë se numri i përgjithshëm i rasteve të raportuara me HIV/AIDS në Kosovë ka arritur në 269 raste. Nga këto, 60 janë raste të vdekjes si pasojë e AIDS-it.
Burim: Zëri
— Redaksia ZHURMA