Çfarë tha Rubio për anëtarësimin e Kosovës në NATO?

UASHINGTON — Sekretari amerikan i Shtetit, Marco Rubio, deklaroi se zgjerimi i NATO-s për të përfshirë Kosovën aktualisht nuk është në krye të agjendës së aleatëve, por shtoi se kjo "nuk do të thotë se një gjë e tillë nuk do të ndodhë kurrë".

Gjatë një seance dëgjimore në Komitetin për Punë të Jashtme të Dhomës së Përfaqësuesve, Rubio tha se bazuar në takimet me ministrat e Jashtëm të vendeve anëtare, NATO-ja "është e përqendruar në çështje të tjera" dhe se "zgjerimi, posaçërisht në rastin e Kosovës, por edhe në raste të tjera, nuk është në krye të agjendës së këtyre vendeve".

Kryetari i Nënkomitetit për Evropë, Keith Self, i cili së fundmi ka vizituar Bosnje e Hercegovinë, Serbinë dhe Kosovën, e cilësoi situatën në Ballkanin Perëndimor si "jashtëzakonisht të brishtë". Self tha se mes Serbisë dhe Kosovës ekziston një "problem i pazgjidhur" dhe i kërkoi Rubios të mbështesë anëtarësimin e Kosovës në NATO, duke biseduar me katër vendet anëtare të aleancës që nuk e njohin pavarësinë e saj.

Kosova synon të bëhet pjesë e NATO-s dhe e Bashkimit Evropian, por shtetet që nuk e njohin pavarësinë e saj, të shpallur më 2008, vazhdojnë të jenë pengesë në integrimin euroatlantik të Prishtinës. Self, së bashku me kolegët Ritchie Torres dhe Mike Lawler, ka paraqitur një rezolutë në Dhomën e Përfaqësuesve që e cilëson praninë e Kosovës në aleancë si "të domosdoshme për mbrojtjen e interesave të sigurisë kombëtare të SHBA-së në Evropën Juglindore".

Rubio gjithashtu konfirmoi se SHBA-ja mbështet kandidatin italian për postin e ri të përfaqësuesit të lartë në Bosnje e Hercegovinë, pas dorëheqjes së Christian Schmidtit. Diplomati italian Antonio Zanardi Landi përmendet si kandidat që gëzon mbështetjen amerikane, ndërsa vendet evropiane kanë kandidatët e tyre.

Burim: Evropa e Lirë
— Redaksia ZHURMA