RMV shtyn afatin e subvencioneve për gazifikim deri në tetor
Sa denarë mund të marrë çdo familje dhe cilat kushte duhet të plotësojë për ta siguruar subvencionin e gazifikimit?
SHKUP — Ministria e Energjetikës, Minierave dhe Burimeve Minerale ka shtyrë deri në fund të tetorit afatin për aplikim për subvencionet e gazifikimit të familjeve, transmeton Portalb.mk. Qytetarët mund të përfitojnë deri në 30.000 denarë, ose deri në 70 për qind të shpenzimeve për lidhje me rrjetin e gazit natyror apo për blerje kaldaje me gaz.
Për zbatimin e kësaj mase janë siguruar 3 milionë denarë, sipas Ministrisë. Mjetet do t'u ndahen përfituesve sipas parimit „i pari që aplikon – i pari përfiton”, deri në shterjen e fondit. Çdo familje mund të paraqesë vetëm një kërkesë.
Të drejtë aplikimi kanë familjet që gjatë vitit 2026 do të realizojnë lidhje të reja me sistemin e shpërndarjes së gazit natyror. Përfitojnë edhe familjet që blejnë kaldajë me gaz për një objekt që ka qenë i lidhur me sistemin deri më 1 janar 2026.
„Ministria u bën thirrje të gjithë qytetarëve të interesuar që t'i dorëzojnë me kohë kërkesat e tyre, në përputhje me kushtet e shpalljes publike. Më shumë informacione mund të gjenden në faqen zyrtare të ministrisë”, thuhet në njoftimin e Ministrisë.
Pas përfundimit të afatit, një komision i formuar nga Ministria do t'i shqyrtojë kërkesat e dorëzuara, ndërsa mbështetja financiare do t'u paguhet të gjithë përfituesve që plotësojnë kushtet. Qëllimi është t'i ndihmojë qytetarët të kalojnë në ngrohje më ekonomike dhe më miqësore ndaj mjedisit, hap i vogël drejt tranzicionit të gjelbër të vendit.
Burim: Portalb
— Redaksia ZHURMA