Gjykata e Sydneyt rrëzon padinë ndaj Rebel Wilson për shpifje
Gjykata e Sydneyt urdhëroi MacInnesin që të paguajë shpenzimet gjyqësore të Wilsonit
SYDNEY — Rebel Wilson fiton gjyqin për shpifje ndaj aktores së re australiane Charlotte MacInnes, e cila kishte luajtur në filmin e saj 'The Deb'. Vendimi u dha nga Gjykata e Sydneyt, sipas raportimeve të BBC-së.
MacInnes pretendonte se Wilson ia ka dëmtuar reputacionin me disa postime në Instagram gjatë viteve 2024 dhe 2025, ku aktorja shkruante se ajo kishte tërhequr një ankesë për ngacmim seksual ndaj një producenti filmi për të avancuar në karrierë. MacInnes i mohoi këto pretendime.
Gjykatësja Elizabeth Raper e hodhi poshtë padinë, duke vlerësuar se pretendimet e Wilsonit nuk përbënin shpifje dhe se MacInnes nuk arriti të provonte se postimet i kishin shkaktuar ose mund t'i shkaktonin dëm serioz reputacionit. Gjykata urdhëroi gjithashtu MacInnesin që të paguajë shpenzimet gjyqësore të Wilsonit.
Çështja lidhej me një incident që kishte ndodhur në muajin shtator të vitit 2023 në Bondi Beach, kur MacInnes dhe producentja Amanda Ghost u futën në të njëjtën vaskë, pasi Ghost kishte pësuar një reaksion alergjik nga uji i ftohtë. Të dyja mbanin rroba banje.
"Të thuash se rrethanat se si përfunduan të dyja në vaskë ishin të pazakonta, do të ishte nënvlerësim", ka thënë gjykatësja.
Gjatë gjykimit, Wilsoni deklaroi se MacInnes fillimisht i kishte thënë se ishte ndier në siklet nga situata me producenten, por më pas e kishte sqaruar se "ishte thjesht një situatë e çuditshme" dhe jo diçka që e kishte bërë të ndihej personalisht e kërcënuar.
Menjëherë pas vendimit, Wilson ka reaguar në Instagram. "Ky proces më ka mësuar shumë. Më ka vënë në provë, por edhe më ka forcuar bindjen se dua ta jetoj jetën duke mbrojtur atë që besoj se është e drejtë, ndërsa vazhdoj të krijoj vepra që u sjellin gëzim njerëzve. Jam mirënjohëse që ky kapitull më në fund ka përfunduar", ka shkruar ajo.
Wilson shprehu gjithashtu respekt për gjykatën dhe sistemin australian të drejtësisë.
Burim: Koha.net, https://www.koha.net/showbiz/rebel-wilson-fiton-gjyqin-per-shpifje-ndaj-aktores-se-re-australiane
— Redaksia ZHURMA