Ramadani kërkon largimin e KFOR-it nga ura e Ibrit
Deputeti i AAK-së thotë se ura duhet të bëhet simbol i normalizimit e mirëbesimit, jo më i tensioneve.
MITROVICË — Deputeti i zgjedhur i Aleancës për Ardhmërinë e Kosovës (AAK), Burim Ramadani, i ka kërkuar NATO-s rishikimin e pranisë statike të KFOR-it në urën kryesore mbi lumin Ibër në Mitrovicë. Në një postim në Facebook ai tha se largimi i pranisë së përhershme nuk do të nënkuptonte dobësim të sigurisë, por një hap përpara.
“Ka ardhur momenti që prania statike e KFOR-it në urën kryesore të Mitrovicës të largohet. Jo si dobësim i sigurisë, por si hap përpara. Sepse, kushtet janë përmbushur”, ka shkruar Ramadani. Sipas Gazetës Blic, ai i ishte drejtuar forcave paqeruajtëse edhe me një letër të hapur.
Ura mbi Ibër ka qenë prej vitesh simbol i tensioneve dhe jostabilitetit, por sipas Ramadanit situata aktuale e sigurisë ka ndryshuar dhe kërkon qasje të re. Ajo duhet të shndërrohet në simbol të normalizimit e mirëbesimit, ndërsa rishikimi i rolit të KFOR-it duhet të bëhet duke marrë parasysh zhvillimet e fundit, vlerësoi ai.
Burim: Gazeta Dukagjini
— Redaksia ZHURMA