Rama nuk largohet nga pushteti pavarësisht protestave dy-mujore
Kryeministri paraqiti aneksin e ri të dokumentit "Besa" dhe tha se kënga e protestuesve "Jep dorëheqjen" e energjizon, jo e shqetëson.
TIRANË — Kryeministri Edi Rama deklaroi sërish se nuk do të largohet nga pushteti pavarësisht protestave dhe thirrjeve për dorëheqje që vazhdojnë prej gati dy muajsh, brenda dhe jashtë kufijve. Deklarata erdhi gjatë një takimi ku Rama prezantoi aneksin e ri të dokumentit "Besa", lidhur me reflektimin mbi lëvizjen në bulevardin e "Flamingove".
Rama iu referua këngës së protestuesve "Jep dorëheqjen", duke thënë se ajo jo vetëm nuk e shqetëson, por i jep energji. "Ajo këngë mua më pëlqen dhe më energjizon, aq shumë sa t'ju them të drejtën më gënjen mendja që mund të bëj një tjetër këngë me të," tha ai.
Kryeministri argumentoi se largimi nga detyra vetëm për shkak të presionit të "një pakice" që bërtet në kor, do të ishte braktisje e përgjegjësisë, jo tipar udhëheqësie apo modesti intelektuale. Të largohesh sot nga vendi, tha ai, do të ishte "një shpërfillje e pafalshme e një porosie të madhe kombëtare", ndërsa PS nuk ka ndërmend të lëshojë pushtetin për shkak të protestave.
Rama tha se misioni i tij do të vazhdojë deri në anëtarësimin e Shqipërisë në BE, dhe se pa këtë agjendë do të ishte tërhequr edhe nga kryesimi i Partisë Socialiste.
Burim: Report Tv
— Redaksia ZHURMA