Rama: Dua të ndaj disa fjalë vetëm me familjen time politike

Ka nisur në 10:00 Asambleja Kombëtare e Partisë Socialiste në Lalëz të Durrësit, ku Sekretari i Përgjithshëm Blendi Klosi çeli punimet dhe sinjalizoi fillimin e saj. Në nisje të takimit, kryeministri dhe kryetari i PS-së, Edi Rama, surprizoi të pranishmit duke urdhëruar ndërprerjen e sinjalit dhe transmetimit për mediat.

Blendi Klosi deklaroi se në këtë Asamble do të lançohet fillimi i fushatës për zgjedhjet vendore të 9 majit 2027 dhe qasja e partisë në territor, duke përfshirë përgatitjen e një materiali për kriteret e zgjedhjes së këshilltarëve bashkiakë. Ndërkohë, sipas raporteve nga takimi, kërkesa e kryeministrit vjen në një kohë kur brenda partisë janë shfaqur diskutime për drejtimin, organizimin dhe përplasjet e brendshme, ndërsa në sfond mbetet kërkesa e Erion Veliajt për shqyrtimin e përgjegjësisë politike të Ramës dhe aktivizimin e procedurës statutore të mocionit të mosbesimit.

Pas ndërprerjes së sinjalit, Rama kërkoi që fillimisht të fliste vetëm me anëtarët e Asamblesë, duke deklaruar: «Dua të ndaj disa fjalë vetëm me Asamblenë, me familjen time politike». Pas disa minutash, ai pritet të mbajë edhe fjalimin e plotë dhe publik për mediat dhe shikuesit.