Rama pranon: do të ishte tërhequr pa BE-në kaq afër

TIRANË — Kryeministri Edi Rama tha se nëse perspektiva e anëtarësimit të Shqipërisë në Bashkimin Europian nuk do të ishte kaq afër, ai mund të ishte tërhequr nga politika pas 12 vitesh në krye të vendit dhe të Partisë Socialiste. Deklarata vjen teksa qytetarë të shumtë i kërkojnë Ramës të largohet nga pushteti.

Në fjalën e tij, Rama u shpreh se do të ishte larguar me mirënjohje të madhe, pas një periudhe të gjatë pune në krye të detyrës më të lartë shtetërore. Në një pjesë tjetër të fjalës tha fjalë për fjalë: "do të isha tërhequr me shumë mirënjohje të madhe në katundin tim të vogël, pas 12 viteve të jetuara me mish dhe me shpirt në krye të detyrës më të lartë që vendi jep".

Sipas Ramës, gjatë 12 viteve të qeverisjes së PS-së, Shqipëria ka pësuar transformime të mëdha, pavarësisht gabimeve dhe të metave. "U bë një Shqipëri aq tjetër nga ajo që morëm në vitin 2013, sa pa këtë orën e historisë në dyert e Europës, mund të quhej me kokën lart mision i përmbushur", tha ai.

Rama argumentoi se hapja reale e negociatave dhe afrimi me Bashkimin Europian e bëjnë mandatin e katërt vazhdimësi të natyrshme të rrugës së nisur në 2013. "Mandati i katërt ishte jo vetëm vazhdimi më i natyrshëm por edhe e vetmja zgjedhje logjike", tha kryeministri.

Kryeministri u zotua se deri në ditën e fundit të mandatit të katërt do të bëjë "të pamundurën" që Partia Socialiste të nxjerrë gjithçka nga vetja për Shqipërinë dhe shqiptarët, siç deklaroi në fjalën e tij, mbajtur teksa vendi përballet me protesta kundër qeverisjes së tij.

Rama u përpoq të shpjegojë pse PS-ja duhet të kërkojë besimin e qytetarëve edhe përtej këtij mandati: jo sepse, siç tha, "dimë ne më shumë se të tjerët", apo sepse kundërshtarët janë "pa kokë", por sepse çështja "ka të bëjë me orën ku ndodhet Shqipëria" — një moment që, sipas tij, nuk i ngjan një rruge të zakonshme që mund të ndalet apo të ndërrojë qeveri në gjysmë të rrugës.

Burim: BalkanWeb
— Redaksia ZHURMA