Një defekt në sistemin e transfertave i zhvat 200 mijë euro Raiffeisen-it
Dy organizatorë përdorën kartat e identitetit të 40 qytetarëve për të kryer transferta në mesnatë pa pasur mbulesë financiare.
TIRANË — Raiffeisen Bank në Shqipëri është bërë pre e një vjedhjeje prej rreth 200 mijë eurosh, pasi disa persona shfrytëzuan një anomali në sistemin e saj të transfertave elektronike gjatë orëve të mesnatës. Ngjarja u zbulua më 29 korrik, kur përfaqësuesit e bankës dorëzuan një kallëzim për mashtrim në Policinë e Shtetit.
Sipas të dhënave, inxhinieri i apasionuar pas programimit R.Z. zbuloi se sistemi i transfertave nuk kryente verifikimin e gjendjes së llogarive rreth mesnatës. Gjatë kësaj dritare kohore prej dy orësh, aplikacioni i bankës lejonte kalimin e parave nga një kartë në tjetrën edhe pa pasur asnjë depozitë apo mbulesë financiare.
Për të jetësuar skemën pa rënë në sy, inxhinieri R.Z. bashkëpunoi me shokun e tij E.M., i cili kishte njohuri mbi sistemet bankare për shkak të punës së tij të mëparshme në institucionin e mikrofinancës Kredo.al. Së bashku, ata vendosën të tërhiqnin vetëm shuma të vogla dhe të shpërndara në llogari të shumta.
Organizatori E.M. siguroi kartat e identitetit të dhjetëra qytetarëve për të hapur llogari të reja, duke krijuar një rrjet prej më shumë se 40 klientësh bashkëpunëtorë. Këta qytetarë dorëzonin dokumentet e tyre kundrejt një shpërblimi prej 100 eurosh nga çdo transfertë prej 400 eurosh që shfaqej në llogarinë e tyre.
Ndonëse skema funksionoi për disa kohë përmes dhjetëra tërheqjeve të vogla, veprimet e dyshimta ranë në syrin e kontrollit të brendshëm kur llogaritë filluan të shfaqnin parregullsi. Raiffeisen Bank ka dorëzuar tashmë në polici një listë me emrat e 40 personave të përfshirë, duke kërkuar hetime të menjëhershme dhe arrestimin e tyre.
Deri më tani, si Policia e Shtetit ashtu edhe Banka e Shqipërisë dhe vetë Raiffeisen Bank kanë zgjedhur të heshtin publikisht për këtë cenim të sigurisë digjitale. Ky qëndrim ka ngritur pikëpyetje mbi transparencën e institucioneve ndaj sigurisë së depozitave të qytetarëve, të cilët mbeten të painformuar për mangësitë e sistemeve.
Burim: Report Tv
— Redaksia ZHURMA
