Qeveria vendos rregulla të reja për resortet miks dhe turizmin

Këshilli i Ministrave ka miratuar rregulla të reja për projektet turistike, duke krijuar kategorinë e re të ndërtimit të quajtur resort miks. Sipas vendimit të datës 5 nëntor, të paktën 60 për qind e sipërfaqes totale të ndërtimit duhet t’i dedikohet turizmit, ndërsa pjesa e destinuar për banim nuk mund të kalojë 40 për qind të kësaj sipërfaqeje.

Kjo nismë mbështetet në nenin 100 të Kushtetutës dhe në pikën 2 të nenit 43/1 të ligjit nr. 93/2015 Për turizmin, të ndryshuar, me propozimin e ministrit të Turizmit, Kulturës dhe Sportit. Me këtë akt, qeveria përcakton kategoritë e strukturave akomoduese sipas tipologjisë, funksionit, mënyrës së organizimit dhe karakteristikave të shërbimit, si dhe kriteret e projektimit e të ndërtimit për projektet e integruara të kësaj kategorie. Në kuadër të klasifikimit të ri, strukturat akomoduese kategorizohen gjithashtu si bujtinë ose shtëpi pritëse, fjetje dhe mëngjes, strukturë akomoduese e trashëgimisë kulturore, si dhe resort miks si nënkategori e kategorisë resort.

Sipas vendimit të Këshillit të Ministrave, përqindjet e ndarjes ndërmjet turizmit dhe banimit do të llogariten ekskluzivisht mbi sipërfaqen totale të ndërtimit dhe jo mbi sipërfaqen e truallit. Projektet e reja duhet të pajisen me një certifikatë paraprake kategorizimi nga ministria përgjegjëse për turizmin përpara se të marrin lejen e ndërtimit. Këshilli i Ministrave njoftoi se ky dokument vërteton përputhshmërinë e projektit me kriteret e kategorisë përkatëse, por nuk zëvendëson lejen e ndërtimit apo aktet e tjera të kërkuara nga legjislacioni në fuqi.

Dokumenti zyrtar përcakton se apartamentet, vilat dhe dhomat e parashikuara për akomodim turistik do të jenë pjesë përbërëse e resortit dhe do të funksionojnë nën një administrim e menaxhim të përbashkët. Për më tepër, njësitë e projektuara për banim nuk mund të përdoren automatikisht për qëllime turistike pa marrë më parë miratimin për ndryshimin e destinacionit. Vendimi sqaron se apart-hoteli përkufizohet si strukturë akomoduese e përbërë nga apartamente për akomodim turistik në pronësi individuale, me recepsion të përbashkët. Ndërkohë, resorti miks përkufizohet si zhvillim i integruar që përfshin strukturën e resortit, njësitë rezidenciale dhe shërbimet e përbashkëta.

Vendimi i ri përcakton se rregullat e miratuara nuk do të prekin certifikatat e kategorizimit të lëshuara më parë. Gjithashtu, projektet që kanë siguruar leje ndërtimi përpara hyrjes në fuqi të ligjit nr. 83/2026 përjashtohen nga detyrimi për marrjen e certifikatës paraprake. Sipas përcaktimeve zyrtare, ky vendim hyn në fuqi menjëherë pas botimit të tij në Fletoren Zyrtare.