Çfarë synon Qendra e Monodramës e themeluar në Kosovë?

PRISHTINË — Edicioni i XVIII-të i Festivalit Ndërkombëtar të Monodramës "MonoAkt" ka shënuar dy momente kryesore: themelimin e Qendrës së Monodramës në Kosovë dhe zhvillimin e një konference ndërkombëtare teatrore me pjesëmarrës nga 12 vende.

Festivali, që ka filluar më 7 qershor dhe përmbyllet më 12 qershor në Teatrin Dodona, përfshin katër konkurrenca — MonoAkt, MonoAkt+, Monostripi dhe Monoperformanca — si dhe punëtori, promovime tekstesh dhe ekspozitë teatrore.

Drejtori Mentor Zymberaj deklaroi se "Themelimi i Qendrës së Monodramës do të ketë një rol të rëndësishëm në zhvillimin e monodramës dhe monoperformancës si gjini artistike, jo vetëm në Kosovë, por edhe në botë". Artistët vijnë nga Spanja, Gjermania, Franca, Ukraina, Moldavia, Kolumbia, Italia, Uzbekistani, Maqedonia, Mali i Zi, Shqipëria dhe Kosova.

Nënkryetarja e Forumit Ndërkombëtar të Monodramës, Nina Mazur, theksoi se "Secili artist sjell ngjyrën e vet artistike dhe çdo shfaqje është e ndryshme", duke shtuar se nga këto "ngjyra" krijohet "një tablo e vërtetë e botës moderne". Juria e çmimeve përbëhet nga Mazur, Slobo Marunoviç (Mali i Zi) dhe Hazir Haziri (Kosovë).

Organizatorët përfshijnë edhe vizita kulturore nëpër Kosovë për të promovuar trashëgiminë dhe turizmin vendas. Festivali, i anëtarësuar në disa asociacione ndërkombëtare, e ka zhvilluar monodramën si "një ndër zhanret më të vështira skenike".

Burim: Zëri
— Redaksia ZHURMA