Qelaj: Rasti i Arlinda Zekajt tregon dështim të shtetit

Avokati i Popullit, Naim Qelaj, deklaroi se Kosova ka nevojë për një diskutim në nivel nacional për të vendosur barazinë gjinore, dhunën ndaj grave dhe dhunën në familje si interes nacional. Komisioni për të Drejtat e Njeriut, Barazi Gjinore dhe Peticione diskutoi mbi rastin tragjik të vrasjes së Arlinda Zekajt në Vitomiricë të Pejës.

Siç raportoi Zhurma më 30.10.2026, QPS-ja kishte dështuar të dorëzonte raportin për rastin, ndërsa ministrat paraqitën të dhëna dhe pati kërkesa për përgjegjësi institucionale, siç mund të lexohet në raportimin tonë të mëparshëm.

Qelaj tha gjatë takimit në komision se rasti i Arlinda Zekajt ka treguar se mund të ketë pasur dështime të shtetit në parandalimin e rasteve të tilla. Ai shtoi se e ndjera ishte adresuar në polici, prokurori, Qendrën për Punë Sociale, te mbrojtësi i viktimave dhe te mekanizma të tjerë, duke përfshirë edhe nivelin lokal dhe Komunën e Pejës. «Shihni rastin e fundit, ndërhyjnë familjarë që nuk kanë të drejta pronësore dhe vije deri te një rast tragjik, natyrisht me dështimin e shtetit, nëse konstatohet që ka pasur dështime, e po shihet se mund të ketë pasur dështime», u shpreh Qelaj.

Avokati i Popullit ndau gjithashtu një shqetësim tjetër lidhur me një viktimë të ndjeshëm nga një komunë e Kosovës, e cila kishte kërkuar mbështetje institucionale, por nuk i ishte ofruar ndihmë me arsyetimin se nuk ka bazë ligjore. Sipas tij, institucioni ka pranuar një paralajmërim se rasti mund të ketë pasoja fatale. Arlinda Zekaj u vra nga kunati i saj në Vitomiricë të Pejës, ndërsa pas ngjarjes ka dhënë dorëheqje drejtori i përgjithshëm i Policisë së Kosovës, Gazmend Hoxha, dhe janë suspenduar kryeprokurorja në Pejë, Lumturie Vuçetaj, prokurorja Arlinda Nallbani-Gacaferri bashkë me 11 zyrtarë policorë.