Pse u vonuan pagat e qershorit në RTK përsëri?

PRISHTINË — Federata Sindikale e Radio Televizionit të Kosovës (RTK) ka kërkuar mërkurën ndërhyrje urgjente institucionale nga kryeministri në detyrë, Albin Kurti, dhe ushtruesja e detyrës së presidentes, Albulena Haxhiu, për mosekzekutimin e pagave të muajit qershor për punonjësit e RTK-së. Në komunikatën zyrtare, sindikata theksoi: “Mosdhënia e pagës në afatin e paraparë ligjor nuk përbën vetëm një problem administrativ apo financiar, por është cenim i drejtpërdrejtë i një të drejte themelore të punës dhe i dinjitetit të çdo punëtori”. Shtoi se paga “është kompensim i fituar me punë, e garantuar me legjislacionin në fuqi të Republikës së Kosovës dhe me standardet ndërkombëtare për mbrojtjen e të drejtave të punëtorëve”.

Njoftimi e bën të qartë se nuk bëhet fjalë për një rast të izoluar: “Vetëm një muaj më parë, më 7 qershor, Federata Sindikale ishte e detyruar të organizonte protesta për të njëjtën arsye. Në atë kohë besuam se reagimi ynë do të shërbente si alarm serioz për institucionet përgjegjëse dhe se do të ndërmerreshin masa konkrete për të parandaluar përsëritjen e kësaj situate. Fatkeqësisht, sot po përballemi me të njëjtën shkelje, gjë që dëshmon mungesë përgjegjësie institucionale dhe dështim në menaxhimin e një prej obligimeve më elementare ndaj punëtorëve”.

RTK-ja ka konsideruar situatën si “papranueshme” për transmetuesin publik të vendit, duke theksuar se kjo dëmton mirëqeninë e punëtorëve dhe familjeve të tyre, besimin në institucionet publike dhe rrezikon funksionimin normal. Ndër të tjera, vlerësuan se bordi dhe menaxhmenti kanë dështuar të ushtrojnë përgjegjësitë e tyre me transparencë, profesionalizëm dhe llogaritje. “Mungesa e informimit publik, heshtja përballë kësaj situate dhe mosofrimi i një zgjidhjeje konkrete janë të papranueshme dhe bien ndesh me standardet e qeverisjes së mirë që duhet të karakterizojnë një institucion publik”, thuhet në reagimin e institucioni. RTK-ja pretendon reagim dhe veprim të menjëhershëm nga institucionet e vendit, në përputhje me përgjegjësinë e tyre për mbrojtjen e rendit kushtetues, të ligjshmërisë dhe të drejtave të qytetarëve. Edhe në të kaluarën, punonjësit e RTK-së kanë protestuar disa herë radhazi për vonesa pagash. Institucionet nuk kanë reaguar ende publikisht kërkesës së sindikatës për veprim të menjëhershëm.

Burim: Sinjali
— Redaksia ZHURMA