Pse SPAK dërgoi për gjykim Erion Isajn dhe 14 zyrtarë të tjerë?

TIRANË — Prokuroria e Posaçme Kundër Korrupsionit dhe Krimit të Organizuar ka mbyllur hetimet e procedimit penal numër 280/1 të vitit 2020, duke dërguar për gjykim në Gjykatën e Posaçme kryebashkiakun e Kolonjës, Erion Isaj. Ai akuzohet për shkelje të rënda në procedurat e prokurimit publik të zhvilluara nga Bashkia Kolonjë.

Kryebashkiaku Erion Isaj akuzohet për veprat penale të shpërdorimit të detyrës në bashkëpunim dhe shkeljes së barazisë së pjesëmarrësve në tendera apo ankande publike. E njëjta akuzë për shpërdorim detyre në bashkëpunim rëndon edhe mbi ish-zëvendëskryetaren e Bashkisë Kolonjë, Eljona Mydini, gjatë kryerjes së detyrës zyrtare.

SPAK ka dërguar për gjykim edhe zyrtarët e Autoritetit Rrugor Shqiptar, duke përfshirë ish-drejtorin e përgjithshëm Ergys Verdho për shpërdorim detyre. Bashkë me të akuzohen edhe Erald Elezi, ish-drejtor i Drejtorisë së Planifikimit Strategjik, Genti Raça, përgjegjës i preventivit, si dhe specialistja Donikë Shehu.

Nën akuzën e shkeljes së barazisë në tendera janë marrë të pandehur edhe specialistët Klarita Konomi e Nikollaq Mihali. Po ashtu, Erdit Salillari, përgjegjës i sektorit të hartimit të projekteve të huaja pranë ARRSH-së, akuzohet se ka bashkëpunuar për të cenuar barazinë e pjesëmarrësve në këtë garë publike.

Nga punonjësit e Bashkisë Kolonjë, Erjon Cenko, Engjëll Dine dhe Ermal Zylfo akuzohen për falsifikim dokumentesh në bashkëpunim dhe shkelje të barazisë. Ndërkohë, zyrtarët e tjerë Armand Tafil, Muharrem Tartari dhe Shpëtim Liço akuzohen gjithashtu për shkelje të barazisë së pjesëmarrësve në tendera publikë.

Procedura e abuzuar ka të bëjë me tenderin për ndërtimin e rrugës Korçë-Ersekë, Loti 2, me fond limit prej 2.879.999.858 lekësh me TVSH, të zhvilluar më 24 shtator 2020. Ndonëse pretendohej se projekti u dhurua nga shoqëria 'A&E Engineering', Bashkia Kolonjë nuk dispononte asnjë dokument projektues.

Nga hetimi doli se administratorja e kompanisë, Entela Çano, dhe zyrtarët Erjon Cenko e Engjëll Dine falsifikuan procesverbalin e marrjes në dorëzim të projektit që nuk ekzistonte. Fondi limit dyshohet se u caktua nga shtetasi Ergys Verdho në cilësinë e titullarit të autoritetit kontraktor.

Burim: ATSH
— Redaksia ZHURMA